263/2024-2025 

Hnahthial the 18^th April 2024: Naktuk maia Lok Sabha MP Inthlanpui neih tawh tura South Tuipui biala inthlan buaipuitu (Polling Party) te chu  tukin khan District Election Officer, District Bawrhsap ni bawk Pu Chuauhnuna chuan Despatch centre, DC office tual zawl atangin duhsakna hlanin a vailiam.

Hnahthial District huam chhunga 29-South Tuipui Assembly Segment-a duty tur vailiam tak te hi  batch-4 a then niin, khaw hla zual- Muallianpui, Bualpui H, Lungpuitlang New Kawnpui, Thingsai-I leh Thingsai-II team te an kal chhuak hmasa ber a ni. Batch hnihna - Ngharchhip, South Vanlaiphai-I, South Vanlaiphai-II, New Ngharchhip, Cherhlun-I leh Cherhlun-II Polling Party ten an dawt a, Batch thumna- S Chawngtui, Darzo-I, Darzo-II, Aithur, Khawhri, S Lungleng leh Tarpho Polling Party-te niin Batch hnuhnung ber te chu Tuipui D, Denlung, Hnahthial-I, Hnahthial-II, Hnahthial –III, Hnahthial-IV, Hnahthial-V leh Hnahthial-VI te an ni.

29-South Tuipui Assembly Segment-ah hian Polling Station 27 awmin e-roll thar berin a tarlan danin  voter mi 16,223 an awm a, hmeichhe voter mi 8,215 awmin mipa voter 8,008 an awm a, Service voters mi 85 nen chuan voter mi 16,308 an awm a ni. Hnahthial-IV ah voter tam berin mi 1202 an awm a, New Kawnpui ah tlem berin mi 56 an awm thung a ni.