4422/2024-2025

Dated Hnahthial, the 25th February, 2025: Hockey dan leh dun inzirtirna - 'Workshop on Umpiring Clinic' chu Hnahthial District Hockey Association buatsaihin vawiin khan Hnahthial MJA Press Club-ah hawnna neih a ni a. Bawrhsap Pi Rita Lalnunmawii Pachuau chuan he Umpiring Clinic hi hawngin Pi Lalrampari, Aizawl District Hockey Association President chuan zirtirna a pe a ni.

Bawrhsap chuan Hnahthial District chu Mizoram puma champion thei tur khawpin Hockey lamah thiamna an nei tha tih an lantir tawh thu sawiin an tih tak tak chuan theihna a neih that zia a lan chian thu a sawi a. Players tha tak tak chher chhuah tur pawh thahnem tak in thukru an awm a a rin thu sawiin chumi thiamna hai chhuah chu thil pawimawh tak a ni a ti a. Lehkha zirna lam ringawt ni lo, infiamna lamah hian eizawnna tlak a awm thu sawiin infiamna lamah thangtharte thiamna a taka pho chhuak thei tur chuan theihtawpin kan puih a tul thu a sawi a. Hockey-ah pawh a tui mi ten thiamna tak tak an neih theih nan Academy-a luhtir a tul thu a sawi bawk a ni.

He Umpiring Clinic a zirtirna petu, Resource Person, Pi Lalrampari chuan he huna training dawng turte chu zirtirna uluk taka ngaithla tura a duh thu sawiin Hnahthial tan mai ni lo, Mizoram pumpui tan Umpire an nih thu a sawi a. Tan bik nei lovin an rorelna ah dikna kengkawh tlat tura a duh thu a sawi a ni.

Training hi February ni 26 atanga February ni 28 thleng zing dar 6-ah neih thin a ni dawn a. SAI, Thenzawla trial nei turte tan Free training HDHA chuan an neihpui thei dawn bawk a ni.

He hun hi Pu Lalremsanga, HDHA Secretary chuan kaihruaiin HDHA President, Pu Laldingluaia Sailo bakah MJA members te he hunah hian an tel a ni.