4119/2024-2025

Dated Hnahthial, the 6th February, 2025: Vawiin khan Hnahthial DC Meeting Hall-ah District Level Committee on Fire Prevention (DLCFP) Chairman leh Bawrhsap ni bawk, Pi Rita Lalnunmawii Pachuau kaihhruaiin  thutkhawmna neih a ni a. Member Secretary leh Lunglei District Divisional Forest Officer (DFO) ni bawk Pu Lalduhthlana hnen atangin Fire Prevention chungchang presentation thlir ho a ni.

Bawrhsap chuan kangmei chhuak hi mihring nunna atan chang ni lovin ramngaw nungchate nuna atan thil hlauhawm tak anih avangin a chhuah lo nan fimkhur a tul hle a ni a ti a.Tun hnai maiah pawh Hnahthial District chhunga in pakhatah kangmei chhuakin buaina leh natna tam tak a siam a ni a ti a. In kang a hlauhawm rual rual in ram kang hi a hlauhawm lehzual a ni tiin chuvang tak chuan kangmei laka inven hi kan ngaih pawimawh takzet a tul thu sawiin kalkhawmte chu hemi lama tan la theuh turin a chah a ni.

Member Secretary chuan thutkhawmna atana rel tur agenda hrang hrangte chu chhawpchhuakin presentation a pe a. Kum hmasa, 2024 chhunga kangmei venna tur atana hmalakna te chu thlir hona neih niin tum kum 2025 a hmalak dan tur te chu rel ho a ni. Tun kumah Fire Prevention Week hi February ni 10 atanga February ni 15 thleng neih tur a ni ang a. A hawnna (Inauguration) hi February ni 10 (Thawhtanni) hian neih tur niin DC Office tual zawlah, Addl. DC Pu Zothanmawia Khiangte chuan khuallian niin a hawng ang a. Kangmei laka inven dan tur te inzirtirna neih a ni ang.

Lo, leipui leh huan hal theih hun hi tun kum 2025 atan hian March 15 thleng niin chumi hnu chuan hal phal a ni tawh dawn lo a ni.

Awareness campaign hi kawng hrang hranga kalpui tum bawk niin hemi atan hian Fire Prevention Theme - "Kangmei ven hi kan tu leh fate hmakhua tan a ni" tih hmangin reel siam inelna neih tur a ni dawn a. Hei bakah hian youtubers, journalist leh kohhran hmangin awareness campaign hi neih tum a ni bawk. Village leh District level-ah kangmei venhim kawnga ti tha te tan - Fire Prevention Award sem a ni bawk ang.

Thutkhawmnaah hian DLCFP member-te an tel tha hle a ni.