216/2025-2026

Dated Hnahthial, the 17th April, 2025: Vawiin khan Hnahthial DC Conference Hall-ah SDO(Sadar), Pi Esther Leihang kaihruaiin Village Level Disaster Management Committee (VLDMC) training buatsaih a ni a. Bawrhsap leh District Disaster Management Authority Chairman ni bawk, Pi K. Vanlalruati chuan he hun hi hawngin Addl DC, Pu Zothanmawia Khiangte chuan thusawina hun a hmang a ni.

He hun hi session li a then niin 1st session hi SDO (Sadar), Pi Esther Leihang chuan DC office leh VLDMC inkara inkungkaihna leh thawhho tha neih a pawimawhzia zirtirna hun atan a hmang a. Chiatna thlen thulhah rang tak leh felfai taka chetchhuah vat zel a nih theih nan DC leh VLDMC te chuan ruahmanna leh inbiak pawhna tha an neih a pawimawh thu a sawi a ni.

2nd Session-ah hian District Veterinary Officer (DVO), Dr. C. Sanghluna chuan African Swine Flu chungchang, vawk thi sawngbawl dan leh a darh zel loh nana kan tih ve theihte zirtirin 3rd session-ah hian Block Development Officer (BDO), Pu Hmingmawizuala chuan VLDMC te chu an mawhphurna leh an tihtur zirtirna a pe a. Session lina leh a tawpna chu vei zawng leh hriat duh zawngte sawi hona hun (Interactive Session) atana hman a ni.

VLDMC hruaitute henah mamawh huna hman tur - Silpauline, Report pekna tur VLDMC Chairman seal leh VLDMC Contingency fund-te chu sem chhuah a ni.

Furpui lo thleng turah District Disaster Management Authority chuan VLDMC-te chu thawhho puiah sawmin Information an hriat reng reng te chu rang leh chak thei ang bera report pe zel turin a ngen a ni.