215/2025-2026

Dated Kolasib the 17th April, 2025 : Vawiin chawhma 10:30 khan Kolasib DC Conference Hall-ah Mizoram Sawrkar 'Bana Kaih' Scheme tha taka kalpui a nih theih nan' Orientation Training for Progress Partner' neih a ni a. Pu Lalmuan Puia, Project Director, District Rural Development Officer (DRDO) chuan he hun hi a kaihruai a ni.

He hunah hian ‘Bana Kaih (Handholding) Scheme’ chungchanga hriattur pawimawhte inzirtirna hun neih a ni a. Pu Lalthanzuala, SDC Kolasib chuan Bana Kaih Scheme hrilhfiahna a nei a, Bana Kaih Apex Body awm dan sawi fiahin, Hand Holders leh Nodal Department-te inzawmkhawm dan leh an mawhphurnate a tarlang a. Pu Lalthanzuala chuan Central Sawrkarin 'Viksit Bharat Policy' a kalpui chu sawizauna a nei nghal a, 'Viksit Bharat' chu India ramin kum 1947 a zalenna a neih atanga kum 100 a tlin na (2047) a ram intodelh - Developed Country ni tura hma a lakna pawimawh tak a nih thu a sawi a. Bana Kaih chu Viksit Bharat a hlawhtlinna tura Scheme pawimawh tak a nih thu sawiin  State leh Central Sawrkar pawn an ngaih pawimawh thu a sawi bawk.

Pu Zoremmuana, District Research Officer, chuan 'Basics of Enterpreneurship' tih thupui hmangin Enterpreneur tha ni tura thil pawimawhte leh Enterpreneurship kalhmang sawizauna a nei a. Pu C. Lalnunpuia, Lead District Manager chuan Bank kalphung leh Loan lak chungchanga hriattur pawimawhte sawizauna he hunah hian a hmang bawk. Pi Melory Lalremkim in Mizoram Rural Bank hnuaia Loan Scheme sawizauna neiin Pi Maria Goretti Lalnunziri'n Mizoram Co-operative Bank hnuaia Loan Scheme sawizauna hun an hman bakah Pi R. Lalrinawmi, Rural Accounts Officer, DRDO chuan Account Bu vawn dan zirtirna a nei bawk a ni.

He hunah vek hian Bana Kaih Scheme hnuaia Sawrkarin Line Department hrang hrang : Agriculture, Horticulture, AH&Vety, LRS&WC-te chu mipuite nen a an in dawr dan kawng a sawihfiahna leh inzirtirna neih a ni a. Bana Kaih chungchangah Zawhna leh Channa hun hawn nghal a ni bawk a ni. Vawiina Kolasiba Orientation Training Programme for Progress Partners hmanna ah hian 'Bana Kaih' hnuaia Progress Partners-te leh Sawkar Line Department hotute leh Chanchinbumite an tel thei a ni.