217/2025-2026

Khawzawl, dated 17th April 2025: Vawiin chawhma dar 10:30 khan DC Meeting Hall-ah district-a sawrkar ram hrang hrang hman dan tur leh siam rem dan tur sawi ho turin District Level Government Land Authority an thukhawm a, Khawzawl DC leh chairman ni bawk Pu K. Vanlalthiana'n meeting a kaihruai.

Chairman Pu K. Vanlalthiana chuan he hun pawimawh taka lo tel te a lo lawm a, tha taka sawihona nei turin a sawm a. District Level Government Land Authority hi sawrkar ram neih ang ang chhinchhiahna mumal tak neih te, sawrkar ram neih dan siamrem leh a tul anga department mamawh zawk te tana sem dan te leh a enkawlna leh a hmasawnna atana sum hman dan tur te ngaihtuah ho tura din a ni tih a sawi bawk. SDO (Sadar) Pu Suvigya S. Chandra leh Settlement Officer Pu Timothy R. Lalhmangaiha te chuan an sawi ho tur tlangpui an sawi hawng a, Treasury Officer ram dil chungchang te, District Court awmna tur chungchang te leh Superintendent of Police tana chenna tur (residence) ram chungchang an sawi tum ber a ni tih an sawi. Member te chuan sawihona tha tak an nei a, district hmasawnna tur leh department hrang hrang rualkhai zawka hmun an neih theihna tur atan rawtna tha tak tak a lut a ni. Chairman Pu K. Vanlalthiana chuan sawihona tha tak an neih avangin lawmthu a sawi a, sawrkar department hrang hrangin mahni ram te ui lova khawtlang tan leh ram tana insiamrem inhuam zel turin a sawm a ni.

He hunah hian district office hrang hrang hotute leh VC member thenkhat an tel a ni.