No.378/2021-2022

Hnahthial the 3rd May 2021 - Covid-19 hrileng laka mipuite an himna tura inkhuahkhirh kalpui mekah hmalak tawhna leh hmalak zel dan turte thlirin Hnahthial-a District Level Task Force on Covid-19 leh Village Level Task Force te chu an Chairman leh District bawrhsap ni bawk Pu H.Dolianbuaia leh Superintendent of Police Pu Lalbiakkila te hovin Hnahthial DC Office Conference Hall-ah vawiin khan an thukhawm.

District Bawrhsap Pu H.Dolianbuaia chuan Covid-19 hrileng chu hmun hrang hranga mipui vantlang-ah a darh tawh thu sawiin "an kaina chin hriatloh an awm ta nual a, kan fimkhur tlan a ngaiin kan him hi a pawimawh ber a ni" tiin Sawrkar-in inkaihhruaina a duan te chu zawm that a tul thu a sawi a, "inkhuahkhirhna kalpui mek hi kan him tlanna tur a ni a, Danin a sawi angin kal mai hi a tha a ni" a ti bawk.

Meeting chuan Hnahthial khawpui chhunga Executive duty post awmsa 3 bakah hmun remchang laiah VLTF te duty-na tur siambelh nise, zan lamah Police ten Patrolling nei thin se, an ti a. Sorkar pisa-a hnawthawk te chu Head of Office ten detailment siamin chung mite chu ID card siam sak bawk se an ti. Hnahthial khawpui chhunga sumdawng bungraw rawn phurhluh te chu a neitu ten Hnahthial an luh hmain an hlan thlakna hmun tur VLTF te an hriattir ang a, VLTF te ruahmanna hnuaiah hlanthlak zel nise, Thawhtanni, Nilaini leh Inrinni ah chauh SoP-in a phal chin dawr hawn leh thlai zawrh phal nise an ti a. Ram lama hnathawk turte chu zing dar 8:30 hmain khua an chhuahsan ang a, tlai dar 5:00 rik hmain khuaah an luh leh an rem tih bakah khawpui chhunga Contract work leh mimal building sakte pawh inkhuahkhirh hun chhung chu chawlh vek nise an ti a. VLTF te chu a khat tawkin Covid-19 chungchanga inkaihhruaina te chu vengchhung information mic atanga puang chhuak thin turin beisei an ni bawk

He hunah hian Member Secretary leh Medical Officer ni bawk Dr.Lalrengpuii Ralte, Medical Nodal Officer Dr.R.Lalsanglura leh Quarantine incharge Dr.Vanlalzawma te chuan report pein hemi atanga a lan danin Hnahthial District chhungah hian mi 1305 quarantine awm tawhin heng zinga mi 1277 te chu an hun hmang zo tawhin anchhuak a, mi 28 quarantine mek ala ni. Covid-19 hrikai hi mi 24 awm tawhin mi 23 enkawl dam an ni tawh a, enkawl mek 1 ala awm bawk.