No105/2021-2022

Covid-19 dona kawnga hmalakna kal zelah vawiin District Level Task Force on Covid 19 Hnahthial chu an Chairman leh District bawrhsap ni bawk Pu H.Dolianbuaia kaihhruaiin a Office Conference Hall-ah an thukhawm a, hmalak tawhna thlirkirin hmalak zelna tur hrang hrang an sawiho bawk.

Meeting kaihruaitu Pu H.Dolianbuaia chuan Covid-19 hrileng darh mek chu Hnahthial District chhung mipui vantlangh darh lo mahsela theihtawp a fimkhur zel a pawimawh thu sawiin DLTF Hnahthial District member te pawh nasa zawka tan la thar turin a fuih a ni. Hnahthial District chhunga khawtin te pawh mahni khaw tih dan.leh kalphung ringawt dah lian lovin Sorkar thuchhuakte ngai pawimawh a, ruahmanna te tha taka zawm turin a chah bawk a ni.

Member Secretary leh Medical Officer ni bawk Dr.Lalrengpuii Ralte tarlan danin Hnahthial District chhungah Covid-19 sample test mi 2296 awm tawhin heng zingah hian mi 23 te chu positive tih hmuhchhuah niin mi 21 enkawl dam ni tawhin mi 2 enkawl mek an la ni. Hei bakah hian Hnahthial District pawn a Hnahthial District chhung mi Covid-19 positive hmuhchhuah 4 an awm bawk a ni. Covid-19 vaccine pawh Health Care Worker, Frontline worker leh kum 60 chin chunglam mi 1018 te hnenah pek an ni tawh a ni

Meeting chuan Quarantine Centre a hman tur khum 20 awmna Govt Hnahthial College Boys Hostel leh Covid Care Centre atan khum 20 awmna KVK Farmer's Hostel te chu a tul thuta hman theih turin ruahman reng nise, VLTF tin te chu an huamchhungah State dang leh Foreign atanga rawn lut te tha takin chhinchhiah nise an tih bakah zan lam Curfew khauh zawka kalpui nise an ti bawk a ni.