Vawiin  khan Mizo Hmeichhe Insuihkhawm Pawl (MHIP) Hnahthial Block chuan Bazar Building-ah Conference vawi 12-na,  an hmang a,  Pu Lal Thanzara, Minister Health & Family Welfare, I&PR & ICT chuan  a hmanpui a, MHIP Branch hrang hrang te Pangpar lam hmangin inelna an nei a ni.

Mizoram pum huapa pawl tha tak MHIP kan nei hi a vanneih thlak hle a, kan ram leh hnam hmasawnna tur leh khawtlang nun siamthatna kawngah te, hmeichhia te dinhmun chawisanna kawngah te tangkai takin hma an la hi a ropui  a, Missionary ten kan ram an rawn zawnchhuah-a a ken tel chu tlawmngai pawl tha tak YMA te, MHIP te leh MUP te kan nei hi Mizo Kristiante kan vanneihna a ni tiin, khuallian Pu Lal Thanzara chuan vawiin hian an hmeichhiatpuite tana nasa taka thawk thin Block MHIP Conference  hman theih a ni hi a lawmawm hle a ni, a ti. Minister chuan MHIP ten sorkar an tawiawm leh thawhpui thinnaah lawmthu a sawi a, sorkar pawhin kawng hrang hrangah sorkar kutke pawimawh tak MHIP te hi a hmang thin a, Mizo hmeichhia zawng zawngte hamthatna tur leh hmasawnnaturinsorkar pawhin nasa takin tan a lakpui thin thu a sawi.

Ei leh in zuk leh hmuam insumna kawnga a bul tan tur chu hmeichhia, nu leh pate an nih thu a sawi a, natna tihdam theih loh HIV/AIDS chungchang pawh sawiin heng natna te hi drugs addict ten an inkai chhawn thin-ah kan ngai a, mahse tunah chuan mipat hmeichhiatna atanga inkai chhawn hi a tam zawk an ni tawh a, nupa kar ni lo, nula leh tlangval inkar-ah te, mi pa leh mi nu te laka sex hman khawlohna avangin kan inkai darh mek a ni a ti a, chutiang laka fimhlim turin MHIP member kal khawmte a fuih bawk a ni.

MHIP Conference hman hi Pi K. Lalramchuani, President, Block MHIP in a kaihruai a, programme hlimawm takin nilengin hun hman a ni.