Vawiin ah khan Mizoram Governor  Lt Gen Nirbhay Sharma (Retd.) leh a nupui, Lady Governor Jyotsna Sharma te chuan chuan  ni 2 chhunga rei hun hmang turin Lunglei an thleng a . Zan in hian  Lunglei ah riakin naktuk ah Aizawl pan in an haw leh ang.

1st Assam Riffles Bn, Lunglawn ah Lunglei Bawrhsap Pu Abhijit Vijay Chaudhari  leh  Pu Zosangliana ,Superintendant of Police, Lunglei , Col. B.B. Pun, Commandant, 1st Assam Riffles Bn leh District Official ten an lo hmuak  a. Industrial Training Institute(ITI) tlawh nghal in hemi hnu ah hian  Saikuti Hall ah Vantlang inkhawm neihpui a ni a, chawhnu ah tho hian Lunglei District Hospital pawh a tlawh nghal a ni.

Saikut Hall ah Lunglei mipui te hnenah thu sawiin Mizoram ah kawng tam takah a ber nihna an lo hauh tawh thin tih a hriat thu sawiin Mizoram hmasawnna atan midangte entawn turin tun aia nasa zawk tan an lak erawh a tul thu Governor  Lt Gen Nirbhay Sharma (Retd.) Chuan a sawi a. Ram hmasawnna atana pawimawh pathum - leilung hausakna, remna leh muanna bakah lehkhathiamna te Mizoram ah a awm sa tawh thu sawiin hlawhtlinna thawkchhuak tur in chung thil pathum chu remkhawm a tul a ni a ti. KMMTP leh Border trade centre hmun hrang hranga buatsaih mek chhawr tangkai turin Mizo thalai ten hmanhmawh taka thiam thil zirtir a ngai a ti a. Heng hmalakna te bakah Rail kawng Sairangah a rawn luh hun phei chuan chuan Mizoram in a thawh sen loh hna a nei dawn a, hman a outpost ni thin kha sumdawnna kawtchhuah leh kawtthler a ni dawn a. Tuna kan tana chona ni ta chu Mizo thalai hnathawk thei tura puahchah a ni a ti. Mizoram chakna hnar chu tlawmngai pawl hrang hrang, kohhran hote leh Sawrkar thawhhona a nih thu sawiin tun hmasawnna liantham neitur erawh chuan Mizo mipuite an inhawn zau zel a ngai a ni a ti a. Governor chuan, ":Mizo ze mawi hlamchhiah chuang silova pawnlam hmasawnna leh thiamna te Mizo ten kan sengluh a kan hnam ziarang mawi te pawh midang hriattir in kan rilru te kan in hawn zau a hun a. Hindi leh English phei chu khawvel hmasawn zel ah kan hlam chhiah thei lova midang nen insum dawn tawn nan leh inthlun ngheh nan kan thiam ngei ngei a ngai a ni", ti in hmasawn nan Mizo mipui te inbuatsaih a hun thu a tarlang a ni.

ITI naupang te nen an inkawmna ah Governor chuan ITI atanga an zirchhuah thiamna chu tun aia a let tam taka nasa in kum 4 vel hnuah Mizoram in a mamawh dawn nia sawiin Mizoram thalai ten hmasawnna a let tam taka rawn pung tur te inpuah chahna fel tak nen an lo hmuah a ngai a ni a ti a. Lunglei  Civil Hospital a tlawhna ah Doctor leh Nurse te chu Infant Mortality rate a tlak hniam nana thawk turin a fuih a. Doctor leh damlo enkawltu te tan damlo te tawng hriat theihloh a awm loh thu leh hmangaih rawngbawl hna chuan mi tumah a thliar hran loh thu a sawi a. Damlo enkawl rawngbawlna chuan ramri a nei lo bawk a ni a ti.

Governor hian Naktuk ah khian Lunglei District Officer te kawmna a neih dawn bakah khawpui chhung leh pawn hmun pawimawh te a tlawh kual leh  dawn a ni.