Nimin ah khan Hnahthial Sub Division MJA member te chuan Greater Hnahthial Water Supply Scheme (GHWSS) trial run neih mek Pumping Site Tuichang an tlawh a, Pu C. Lalhmahruaia, EE, PHE, Hnahthial Division leh a thawhpui ten an lo dawngsawng a ni.

Rs. 8,25,00,000 senga siam Greater Hnahthial Water Supply Scheme (GHWSS) hi kum 2012 atang thawh tan niin civil works thenkhat chu deprtment leh contructor ten an thawk a, pump site tak hi Johnson Diesel Sales & Service (JDSS) te thawh niin tun Thawhtanni atang khan Trial Run neih tan a ni a, Trial Run chhung tur hi agreement ang chuan darkar 72 chhung neih tur a tih a ni. MJA memberte chuan chipchiar takin Intake (Tuichang) atanga tui pump chhohna te, Aerator te, Filter House te, Overhead/backwash tank te, Tui tihthianghlim sa an dahna, cleart water tank te leh Pump House te an tlawh a, PHE thawktute chuan an hrilhfiah zel a, tun dinhmun-a harsatna a awm lo niin thawktute chuan an sawi a, tluang taka trial run an neih theih an beisei thu an sawi bawk.

Thawktute chuan Tuichang atanga pump in ITC tlang-a main reservior-ah darkar khatah liters 60,000 a pump thei niin an sawi a, Pump site tui thianghlim dahna atang hian 150mm pipe hmangin pump khawl-in a hip a, pump khawl atang hian 125mm pipe in ITC tlanga main reservior-ah a pump chho leh a ni. Hnahthial khawpui chhung hmu 4-ah reservior awmin tui liter 12,00,000 chuang a dawng thei a ni. Trial Run neih chhung hian tui a tam avangin thawktu te chuan valve zawng zawng hawng vek turin hriattina an chhuah a ni. GHWSS Pump site hi Hnahthial khawpui chhung atanga 7kms-a hla a awm a ni.