1479/2023-2024

Hnahthial the 14th August 2023: Horeb Conference Hall, Hnahthialah vawiin khan District Level Task Force on Ruihhlo Do thutkhawmna neih a ni a. He hunah hian Social Welfare & Tribal Affairs Minister Er. Lalrinawma chuan khuallian niin a hmanpui.

Minister Er. Lalrinawma chuan ruihhlo in ram nasa taka a run mek thu sawiin, ruihhlo dona atan hian sawrkar chuan Chief Minister kaihhruaina hnuaiah Ruihhlo Do Core Committee dinin Social Welfare and Tribal Affairs Minister kaihhruainain Working Committee din leh a nih thu a sawi a. Ruihhlo dona atan hian thuang thuma hmalak a ni tiin; Supply Reduction, Demand Reduction leh Harm Reduction a nih thu a sawi. Minister chuan District level mai bakah thingtlang khaw hrang hranga Village Level Task Force din a tul hle tiin ruihhlo dona kawngah a pawimawh hle a ti a. ‘Tuna kan chhungkua kan fihlim avang hian ngaihtha taka awm mai tur kan nilova, a rem thuai loh chuan tuar thei vek kan ni’ tiin midangte tan nilovin mahni tan theuha do an nih thu hre reng turin kalkhawmte a chah a ni. Thalai hnathawk hlei thei lova enkawl ngai; Home-a awm an tam ta lutuk te chu runthlak a ti hle a , mitinten puanven sawi chhinga ram dam nan tangrual a, mitin mawhphurhna a nih thu hre reng turin kalkhawmte a chah a ni.

Vawiina District Level Task Force on Ruihhlo Do thutkhawmah hian Pi Zodinpuii, Joint Director SW&TA; Pu Robert Zosangliana Field Facilitator MSD&RD; Hnahthial District SDO (S) leh District Level Ruihhlo Do Committee Member Secretary Pu Nengthian Lala, District CMO, CEO leh Police aiawhte pawhin thusawina neiin an hmalak tawhnate leh hmachhawpte an tarlang bawk. Vawiin thutkhawm hi Additional DC Pu Lalvenhima’n a kaihruai a ni.