2340/2024-2025

Dated Hnahthial, the 2nd October, 2024: Vawiin chawhma dar 11:00 khan Hnahthial DC Conference Hall-ah India ram puma faina beihpui thlakna- 'Swachhata Hi Seva' kharna leh 'Swachh Bharat Mission' kum 10 tlin lawmna - 'Swachh Bharat Diwas' chu Hnahthial District tan neih a ni.

He hunah hian Bawrhsap, Pi Rita Lalnunmawii Pachuau chuan thu sawiin 'Swachh Bharat Diwas' chu India ram pa, Mahatma Gandhi pianchama neih a nih chhan chu Pu Gandhi-a khan faina a ngaihpawimawh em vang a nih thu a sawi a. Sawrkar laipui pawn faina a ngaih pawimawh avangin he hun hi hman a nih thu sawiin kum 2014 atang khan faina beihpui 'Swachh Bharat Mission' hi a lo kalpui tawh a ni a ti a. Chutiang ang bawk chuan he hun hmanga kalkhawm zawng zawngte chuan faina ngai pawimawh turin leh nunpui tura a duh thu a sawi a. Faina chu mahni atanga in tan niin mitin chu faina mawhphurtu an ni a ti a. Faina hian hriselna leh changkanna a ken tel avangin district hrisel leh changkang ni tur chuan mahni zawn theuhvah faina atanga bul tan a pawimawh thu a sawi a. Mahni in leh a chhehvel tihfai hi midang kuta dah lovin chhungtin leh mimal tin ten mahni kutah dah a, mahni hmazawn theuhvah faina kalpui turin a sawm a. Mahni ran vulh te pawh tlat tir mai mai lovin midang tana hnawk lo tura enkawl a pawimawh thu a sawi a. Faina dah pawimawh a, ngai pawimawh turin mitin chahin fai hi inzir thar theuh turin rawn kalkhawmte mai bakah Hnahthial District chhunga mimal tinte a sawm a ni.

Pu Hmingmawizuala, District Urban Development Officer (DUDO) chuan he hunah hian ' Swachhata Hi Seva Campaign ' hnuaia hmalakna hrang hrang neih takte tarlanna hun a hmang a. He faina beihpui hi September ni 17 atanga neih tan niin October ni 2 thleng hian neih a ni a. He faina campaign hnuaiah hian hmun bal zual zawnchhuahna (black spot identification) te neih niin faina hnatlang (Shramdaan) te neih a ni a. ICDS leh Mzsrlm te nen a theih ang angah convergence neih niin faina hnatlang office tinah neih a ni bawk a. Thlanbik hmunah thing phunna neih niin 'Swachhata Run' bakah 'Swachhata Class' te neih a ni a. Govt. Hnahthial College Literature Club te nen tangkawpin Article writing competition neih niin Special Gram Sabha neih a ni bawk. He campaign hi khawpui/town (Urban) lamah UD&PA chuan kalpuiin thingtlang (Rural) lamah PHED in an kalpui thung a ni. Campaign hi District Steering Committee endikna hnuaia kalpui niin he Commitee ah hian Bawrhsap chu Chairman a ni.

DUDO, Pu Hmingmawizuala chuan report a pek zawh hnu hian thusawi tawi neiin he campaign hlawhtlinna a tel zawng zawngte hnenah lawmthu a sawi a. Faina leh hriselna a inzawm tlat thu sawiin fai hi sum tam tak man a ni a ti a. Khaw fai leh ram fai nei tur chuan thawk leh khata tih thut chi a nih loh thu sawiin ka nitin nunah kan behtir zawk a tul thu a sawi a. Fai tur chuan tanrual a pawimawh thu sawiin faina chu mahni inchhungkhur theuh atanga tan a tul a ni tiin chhungkaw tinte chu faina inzirtir uar turin a chah a ni.

Pu Vanlalrova Varte, District Nodal Officer, NSS hnen atangin faina beihpui puala NSS hmalakna hrang hrangte ngaihthlak a ni a. Hemi zawh hian UD&PA leh Govt. Hnahthial College(GHC) Literature Club tangkawpin faina beihpui puala an buatsaih, college level Article writing Competition lawmman semna neih a ni a. Lawmman dawngtute chu a hnuaia tarlante hi an ni.

1st Prize: Lalsiammawii  ; 5th Semester, GHC

2nd Prize: C. Rodingliana; 5th Semester, GHC

3rd Prize : H. Zodinpuii; 5th Semester, GHC

Consolation prize hi mi pathum hnenah hlan an ni bawk.

He Article writing competition thupui chu - 'Faina, Mitin Mawhphurhna' tih niin judge atan GHC a Dept. of Mizo atanga Assistant Professor pathum te chu hman an ni.

Khaw fai lawmman - Prize for Cleanliness semna chu Public Health Engineering Department (PHED) lam atanga neih niin lawmawm dawngtute chu a hnuai amite hi an ni.

Certificate of Appreciation:

1. Pangzawl South

2. Rawpui

Certificate of Acknowledgement: Tuipui 'D'

Best Participant: Bualpui 'V'

Best Performance: Thiltlang

Pu Zothanmawia Khiangte, Addl. DC in he hun hi kaihruaiin SDO( Sadar), Pi Esther Leihang hnen atanga lawmthu sawina ngaihthlak a nih hnuin he programme hi khar a ni.

He hunah hian Hnahthial District Head of Office te, Govt Hnahthial College Literature Club te, NSS member te bakah sawm bikte an tel a ni.