1600/2024-2025

Dated Hnahthial the 15th August, 2024: India Independence Day vawi 78-na chu Hnahthial HDFA Turf Ground-ah vawiin khan India ram hmun dangte rualin ropui taka lawm a ni a. Khuallian Dr Vanlalthlana, School Education Minister chuan India Hnam Puanzar pawt pharhin Parade Contingent 11 te chibai a chhang let. Hnahthial bialtu MLA Pu Jeje Lalpekhluan he hunah hian a tawiawm a ni.

Khuallian Dr. Vanlalthlana chuan Independence day puala thuchah sawiin India-in zalenna kan neih aṭanga a champha vawi 77-na leh Independence vawi 78-na Hnahthial District khawpuia hman theih a ni chu lawmawm a tih thu sawi a. Tun kum India zalenna champha muanawm taka kan thleng leh thei hi vanneihthlak a tiin a lawmawm tak zet thu a sawi.

Kumin Independence Day atana sawrkarin a tum ber chu ‘Viksit Bharat’ (Developed India) a ni tih sawiin chumi tum ber chu kum 2047-a India Independence Day vawi 100-na tlin kuma ‘Ram Intodelh India’ a siam a ni a ti a. Independence Day, India-in min awptu laka zalenna kan neih kan hriat chhuah rualin, chu zalennain khawtlang leh mi mala zalenna min pek tel chu hre reng chung a hmasawnna kawng zawh nan hmang ṭangkai zel tura a duh thu a sawi a. Chu zalenna kan neih theih nana kan ram hruaitu mi ropui tak takte chu hre reng a, zahna chibai buk thar leh ṭurin mipui te chu a sawm a ni.

Kum 20 dawn Hnathiala hotuten District nei tura an hun leh tha an lo sen ṭhin avangin June ni 3, 2019 khan Hnahthial pawh district puitlingah hlan kai a lo ni ta chu lawmawm a tih thu a sawi a. Hnahthial chu district puitlinga hlan kai a nih aṭangin kum 5 lai a lo kal leh ta leh Independence Day pawh ṭum 6 hman a lo ni ta chu a lawmawmin hmasawnna ropui tak a nih thu a sawi.

Hnahthial chu District puitlinga hlan kai a nih hma pawhin khaw entawntlak leh Mizorama khaw langsar pawl tak a nih sa reng thu sawiin Hnahthial District huam chhungah pawh khua leh hmun pawimawh leh lar tak tak a awm thu a sawi a.

Mizo thu leh hla lama hming lian ber pawl, Thingsai khua leh tui Saikuti bakah Lalsangzuali Sailo te lo seilenna hmun niin lalnu ropui berte zinga mi Denlung lalnu Ropuiliani leh Darzo lalnu Darbilhi te rorelna ṭhin a ni a. Hengte avang hian Hnahthial District hian a hmingthan phahin Hnahthial District hi Zofate hmunpui atana awhawm tak mai a nih thu a sawi.

Vai Len vawi hnihna lai pawh Darzoa Fort Tregear te han ngaihtuah hian Hnahthial District awmna lai hi Mizoram tan strategic takin a pawimawh tih a lan chian thu a sawi a. Myanmar nena inri an nih avangin security thilah te, dan lova thil tawlh ruk danna kawngah te Hnahthial chu a pawimawh hle a ni a ti bawk.

Hnahthiala thil tih chhinchhiahthlak tak mai pakhat chu Tuipui D lui an humhalh chu a nih thu sawiin  tunlai khawvelah chuan khuarel humhalh hi a pawimawh thu a sawi a. Mihringte hi khuarel ‘tichereutu’ ni lova ‘enkawltu’ tura Pathianin kan chunga mawhphurhna a dah kan nih ang takin Hnahthial mipuiten heimi kawngah ṭha tak maia an kalpui hi a lawmawm thu a sawi.

Hemi anih rual hian Hnahthial District chuan hmasawnna tur tam tam an la neih thu a sawi a. HSLC exam-ah Mizoram puma top 10-a lang pawh mi 10 an awm tawh chu lawmawm a tih thu sawiin hemi rual hian tunlai mamawh thiamna, kum zabi 21-na thiamna (21st century skills) hawi zawnga zirna kan kalpui a, thiam thil bik neia eizawn nana kan hman thiam zel a ngaih tur thu a sawi a.

Infiamna lamah pawh theihna nasa tak an nei a a hriat thu sawiin bialtu MLA pawh junior leh senior level-a Indian football team captain ni thei a ni a. Ama hnung zuiin, a hmalakna azarah infiamna kawng hrang hrangah state level aia sang an thlen zel theih a beisei thu a sawi bawk.

Hanhthial chu Tourism-ah potential an neih that thu sawiin heritage tourism atan Darzo leh Denlung a awm a. Heng hi hlut thiam a tih lar thiam zel a ngaih thu sawiin chu mai bakah hmunhma nuam tak tak, ecotourism atan Tuipui D te, Purun Tlang te, South Vanlaiphai te, South Chawngtui te a awm a. Heng hmang hian kualzin hip thiam tura chahin chu chuan revenue tam tak Hnahthial tan a hai luh theih tur thu a sawi bawk a ni.

Hnahthial chu district hlun zawk a lo nih zel theih nan district thar nihna rilru pu lovin, Mizoram District zinga entawntlak leh kawng hrang hranga hmahruaitu ni tura ṭang rual zel turin kalkhawm zawng zawngte chu a fuih a ni.

Khuallian chuan Hnahthial district-a department hrang hrangte hmasawnna leh hmachhawpte chu tarlangin heng hmasawnnate hian Hnahthial District changtlun tawhzia a tarlan chian thu a sawi a ni.

Khuallian thusawi kimchang: dipr.mizoram.gov.in/post/hnahthial-independence-day-2024-lawmna-a-khuallian-school-education-minister-dr-vanlalthlana-thusawi

Khuallian chuan hnam dang te ruala hma kan sawn chhoh zel theih nan zalenna, intluktlanna leh inlungrualna chu chawikang zel turin mipuite chu a chah a. Zirna leh ram humhalhin kan thlah lo kal zel turte tan a hnutchhiahtlak ram siam ngei thei turin mipuite chu a sawm a. Mipuite tawiawmna avanga lawmthu sawiin kan ram leh state-in hma a lo sawn chhoh zel theih nan leh India ram tha zawk din turin kalkhawm zawng zawng te chu a sawm a ni.

Hnahthial Independence Day, 2024 lawmnaah hian contingent 11 awmin armed contingent 1 leh school contingent 10 an awm a. He hunah hian lawmman semna neih nghal a ni bawk a. 

I. Kangmei laka invenna (Fire Prevention) award lawmna semna neih niin lawmawm la tute chu :

1st prize : Darzo VC. Cheng sing nga (Rs. 50,000) leh citation an dawng a ni.

2nd prize: Pangzawl joint VC. Cheng sing thum (Rs. 30,000) leh citation an dawng a ni.

3rd prize : Khawhri VC. Cheng sing hnih (Rs 20,000) leh citation an dawng a ni.

II. MLA award sem bawk niin Lalramluahpuii d/o C. Lalduhawma chu HSLC, 2024 a Mizoram pum a pali na a nih avangin Rs. 50,000 chu hlan a ni.

III. Armed contingent parade lawmman chu Govt. Hnahthial College NCC chuan dawngin School contingent parade lawmman chu tiang hian sem a ni:

1st prize : Govt. Southern High school 

2nd prize: Govt. Higher Secondary School (Girls)

3rd prize: FD Higher Secondary School 

Lawmman semna neih zawh anih hnu hian hnam puanzar chibai bukna neih niin lawmna hun hi khar a ni.