1599/2024-2025

Dated Lawngtlai, 15th August, 2024: Tukin zing dar 8 khan Central Young Lai Association (CYLA) Play ground, Chandmary-ah India Independence Day vawi 78 -na ropui taka lawm a ni a, Pi Lalrinpuii, Minister, Health & Family Welfare chuan  khuallian niin a hmanpui.

Khuallian Pi Lalrinpuii chuan  ‘Independence Day’ lawmna hmun a thlen veleh hian India hnam puanzar pawt pharhin Parade Contingent-22 in zahna chibai an hlan a chhanglet a, Independence Day thuchah a sawi chhunzawm nghal  a ni.

Pi Lalrinpuii chuan India ramin zalênna kan neihna tûrin mi tam takin an nunna hlu tak an hlan a, an finna, thiamna leh theihna zawng zawngte hlanin, an that lai hunte tân inahte an hmang a ni, a ti a. Thangtharte hian zalênna sualtute inpumpêknate, mahni hmasial lova an beihna zawng zawngte  zah ila; vawiin hun hi anmahni avânga  thleng thei kan ni tih i hre thar leh ang u a ti.

Health Minister chuan   India ramin zalênna a hmuh theihnâna thisen leh thlantui tam tak nêna lo beitu tam tak zîngah, India Hnam Pa  Mahatma Gandhi te, Subhas Chandra Bose te leh Pasaltha dang tam tak te zahna Chibai  bûk i la; ram leh hnam tâna an inpumpêkna leh hmangaihna thinlung chhuanawm tak an neihte  kha i entawn  leh theuh ang u tiin a sawm a.

Zalênna hi hmasâwnna rahbi pawimawh tak a ni a, he zalenna hian mawhphurna a keng tel ani tih kan hriat a tul hle tiin, kan ram Democracy lungphum veng him tur te, kan sakhaw zalenna venghim tur leh thil dang tam taka khua leh tui tha kan nih theihna tur atana  kan mawhphurhna hlen chhuah i tum theuh ang u a ti .  British sawrkâr awpna atanga kan chhuah hnu chuan India ram chuan chak takin hmasâwnna a kalpui a. Mizoram sawrkâr pawhin kawng hrang hrangin hmasâwnna tûr hna tam tak a thawk mêk zêl a ni. Hetiang kârah hian Lawngtlai District-ah pawh sawrkârin hmasâwnna a kalpui mêk zêl a ni tih sawiin, sawrkar tha taka thawhpui tur leh  ram leh hnam tana theitawp chhuah zel turin Lawngtlai mipuite a sawm nghal a ni.

Vawiin Independence Day vawi 78- na lawmna ah hian Parade Contingent 22 - Armed  Contingent -1, Unarmed Contingent- 7  leh School Contingent -14 awm in, Parade Commander hi Sub-Inspector (AB)  Lalrinkima, (AB)  3rd IR Battalion, Thingkah a ni a, 2nd Commander hi Sub-Inspector (AB) R. Dawngliana 3rd IR Battalion, Thingkah niin, Don Bisco School- ten National Anthem an sa bawk a. Parade Contingent-te lawmman lak dan chu hetiang hi a ni:

Unarmed Contingent
Pakhatna - NCC Don Bosco School
Pahnihna - Ngurnunsangi High School Guides
Pathumna- Don Bosco School Scouts and Guides

School Contingent
Pakhatna -Ngurnunsangi High School Girls
Pahnihna - Vista English School
Pathumna -Govt. Southern Public High School

Vawiin Independence Day lawmnaah hian Lawngtlai District atanga HSSLC Examination -a ti tha - Suchismita Ghosh (5th Rank), F. Lalneihpuii (6th Rank) leh Elizabeth Laltuanpuii (9th Rank) te hnenah lawmman pek niin, Independence Day puala Badminton Tournament lawmman sem a ni bawk a.  Lawngtlai khawpui chhunga damdawi in pathum – District Hospital Lawngtlai, Lairam Christian Medical Centre & Hospital leh Christian Hospital Lawngtlai bakah chhawmdawlna in – Lairam Motherless Home, District Jail, Lairam Rescue Centre leh Gilead Drop-In Centre-ah te Independence Day pual ṭanpuina thilpek hlan a ni bawk.

Khuallian  thusawi kimchang hi a hnuaia link-ah hian chhiar theih a ni e.

https://dipr.mizoram.gov.in/post/speech-of-pi-lalrinpuii-ministerhealth-family-welfare-etc-on-the-78th-indian-independence-day-celebration-at-lawngtlai-15th-august-2024