1598/2024-2025

Dated Aizawl, the 15th August, 2024: India ramin zalenna a hmuh champha 78th Independence Day chu Aizawl AR Lammualah ropui taka lawm a ni a. Chief Minister Pu Lalduhoma chu khuallian a ni.

Khuallian hian hnam puanzar pawt pharhin parade contingent 27 te chibai bukna a chhanglet. 

Hemi zawh hian thusawiin, zalenna champha lawmnaa kal khawm mipuite, Mizoram leh khawvel hmun danga cheng Zofa zawng zawng te duhsakna chibai bukin, Mizoramin hmasawnna hmel thar a hmuh theih nana thawhpuiah a sawm a. India ramin zalenna a hmuh theih nana beitute zahna chibai a buk bawk. 

A kaihhruai sawrkarah rinna an nghah avangin mipuite chungah lawmthu a sawi a. Mipuite beisei ang ngeiin "A hmasa berah Mizoram" tih rilru pu chungin hna kan thawk dawn a, thla riat vel chauh sawrkar kan kaihhruai chhung hian thil inthlakthleng tam tak a awm tawh a ni, a ti. Mizoram sum leh pai dinhmun sawh ngheta siam tha turin hma kan la nghal a, chutihrualin a nghet lova kum tam tak sawrkara lo thawk tawh te dahnghehna tur ruahmanna pawh siam a ni. Ni za chhunga kan tihtur kan tarlan Chief Minister's 100 Days Programme chu tha takin kan hlen a, thlai thar leina tur budget-ah kan dah a, a lei dan ngaihtuaha bawh zuitu tur Agricultural Market Assurance Fund Management Board kan din a. Sum leh pai daihzai taka hmang tur leh inrenchemna fel taka kan kalpui theih nan Resource Mobilization Committee kan din a, sawrkar policy tha taka a kal theih nan leh hnathawktute inkara inthlunzawmna tha siamtu tur Mizoram State Policy Coordination Committee kan din a, hnathawh tinreng endika hnai taka vil tlattu tur Project Monitoring Committee kan din bawk. Heng board leh committee te hian hna pawh an thawk nasa tawh hle. 

Hun rei tak atanga lo tling khawm tawh Power leina bill ba Rs. 448 Crore kan pe a, a hun taka bill kan pek zui tak avangin, pek tlai vanga chawi belh tur (surcharge) Rs. 58 lakh kan hum a, hamthatna (rebate) Rs. 35.25 lakh kan hmu let ta zawk hial. Hun engemawchen sawrkarin a lo bat sak tawh Health Care Bill tang Rs. 50 crore chu kan pe chhuak a, hun rei tak atanga lo tling khawm tawh pension sum ba Rs. 256.75 crore kan pe chhuak a, GPF tang vanga harsatna tawk sawrkar hnathawkte harsatna hriatpuiin kumin June thla thleng khan Rs. 359.89 Crore kan pe chhuak tawh a ni. K-deposit a hun rei tak sum lo tang tawh Rs. 425.49 crore kan pe chhuak a, MLA Fund atan first instalment Rs. 40 Crore kan pe chhuak bawk. Sawrkar hnathawk hlawh atan hian thla tin Rs. 330 crore vel leh pension atan Rs. 82 crore vel pek chhuah thin a ni. 

Mizoramin investor te a hip luh tam theih nan The Mizoram Sustainable Investment Policy, 2024 kan siam a, kumin February atangin kan hmang tan a. Department ten mipuite tana service an pek chhuah thin te chu tam lehzual an pek chhuah theih nan Mizoram Right to Public Services Act 2015 hnuaia service pek theih zat chu 140 atangin 192 ah tihpun a ni. Mipuiten he dan hi hmang tangkai se kan duh hle. Bana Kaih Policy hi sector hrang hrang te tihchak nan kan hmang dawn a, kan thalaite tan eizawnna bul tanna tur kawngka zau takin kan hawng ang. Hemi kaihhnawihah hian thlai thar te hlawk zawka kan hralh theih nan Chhingchhipa MIFCO Plant chu tharthawh leh a ni. MSME hmalakna lian tak MSME Elevate Mizoram scheme thar kan tlangzarh tawh a, bultanna tur sum puk mamawhtuten awlsam zawka an puk theih nan Mizoram Credit Guarantee Scheme kan duang fel a. Bana Kaih policy nena inhne rem turin Mizoram Ceiling on Government Guarantees Act 2011 pawh kan siam danglam ang. Loan Rs. 50 lakh chin puk tur te tan sawrkar chu guarantor ah a tang dawn a, interest pawh sawrkarin a tumsak dawn a ni. 

Kumin chhungin Rs. 66.82 crore man hu ruihhlo man a ni tawh a. Ruihhlo do hna hi chak zawka kan kalpui theih nan State Level Ruihhlo Do Core Committee chu din tharleh a ni. Thlai thar atanga hlawkna tam zawk kan hmuh theih nan Mizoram Liquor (Prohibition) Act 2019 leh a kaihhnawih dan te pawh siam danglam hret tum a ni. 

Ration card kalpui dan thar avang hian sawrkar chuan thlatin Rs. 300 lakh vel a hum thei dawn a. He hmalakna hian chhungkaw harsa zawk te a hrut tel dawn lo, a ti bawk. 

Heng bakah hian leilung chhiatna tuartute tana sawrkar hmalakna te, police tichak tura hmalakna te, khawvel hmun hrang hranga cheng Zofate a tul anga huikhawma ngaihtuahtu tur Zo Diaspora Cell din a nih thu te, tun hnaia sawrkarin ram pawna hnathawk harsatna tawk a chhanchhuah thu te, State Institute for Transformation din a nih thu te, CSR Cell chak tak din a nih thu te, year of consolidation a ral hnua kalpui tan tura sawrkar hnathawkte DA tihpun a nih thu te, Universal Health Care Scheme sawrkarin a ngaihtuah mek thu te a tarlang bawk. 

Chief Minister thusawi kimchang :  https://dipr.mizoram.gov.in/post/independence-day-2024-lawmna-aizawl-sipai-lammual-a-chief-minister-pu-lalduhoma-thusawi-15th-august-2024

Khuallian hian parade contingent lawmman dawngtute hnenah lawmman a hlan a, lawmman dawngtute chu:

Parade Commander Pu R. Lalnunpuia, Dy. SP, CID (Crime), 2nd Commander Pu Jeremia Vanlalhmachhuana, Dy. SP, CID (Crime)

Armed contingent-ah pakhatna 2nd Assam Rifles, pahnihna 10th Bn. Tripura Rifles leh pathumna 3rd Bn. MAP te an ni.

Unarmed contingent-ah pakhatna Sainik School, Chhingchhip, pahnihna 20 Mizo Bn. NCC (Govt. Hrangbana College), pathumna Mary Mount School Girls te an ni.

School Contingent-ah pakhatna St. Pauls H/S, pahnihna Assam Rifle M/S, pathumna Govt. Mizo H/S te an ni.

Khuallian hian zirtirtu tha chawimawina dawngtute leh police thawk tha lawmman te a hlan bawk a. Lawmman dawngtute list hi PR ah hian attached a ni.

POLICE LEH ZIRTIRTU HNA THAWK THA LAWMMAN DAWNGTUTE.pdf

AR Lammuala a lawmna pui ber neih a nih hnu hian Governor Dr. Hari Babu Kambhampati chuan Raj Bhavan ah dignitaries leh sawm bik te tan At Home Function a buatsaih a. Central sawrkarin scheme hrang hrang a neihte Mizoram mipuiten tangkai taka an hman theih nana thahnemngai taka hmala thintu Governor hian central scheme beneficiary thenkhatte he At Home Programme ah hian a sawm a. Mizoram mipuite chu Central Scheme nasa zawka ngaihven turin a sawm a ni. At Home a beneficiary a sawm bik te chu:

1. Ramdinsangi Chhinga Veng leh Lalruatkimi Aizawl Venglai, - Pradhan Mantri MUDRA Yojana Beneficiary

2. Denghmingmawia Tuikual South leh Lalchhuanmawii Chhinga Veng, - Pradhan Mantri Awas Yojana Beneficiary

3. Pi Zothankimi Sairang Dawr Veng leh Pi Lallawmkimi Sairang Dawr Veng, - Pradhan Mantri Ujjwala Yojana Beneficiary

4. Lalhmangaihthangi Bawngkawn Aizawl leh Lallawmawmi Bawngkawn Aizawl, - Pradhan Mantri Jeevan Jyoti Bima Yojana Beneficiary

5. Laltanpuii Hunthar leh Lalhmangaihthangi Bawngkawn - Pradhan Mantri Suraksha Bima Yojana Beneficiary

6. Agnes Vanlalkawltiri Bawngkawn leh Lalnunziri Bawngkawn, - Atal Pension Yojana Beneficiary