1762/2023-2024

Hnahthial the 5th September 2023: District Level Committee on Teachers’ Day 2023, Hnahthial huaihawtin vawiin khan India ram chhung hmun dangte rualin Government Middle School Hnahthial-ah Teachers’ Day vawi 62na chu ropui taka lawm a ni a. District Bawrhsap Pu Chuauhnuna chuan Khuallian niin a hmanpui.

Khuallian Pu Chuauhnuna chuan zirtirtute ni ropui taka Khuallian a sawm a ni chu lawmawm a tih thu a sawi a. Zirtirtu hna chu a zahawmin a ropui hle a ti a, mitin dawmkangtu an ni tiin zirtirtute zawng zawng zahna chibai a buk a ni. Zirna thiltihtheihna sawiin mi chaklo zawkte mi chak bera siam theitu a ni a ti a, zirlai naupangte zirtirna kawngah thahnemngai tak leh inpekna thinlung nena thawk zel turin zirtirtute a fuih a ni. Zirna quality tha leh tluantling neih a pawimawh hle tiin chhungril theihna leh thatna chher hriam thiam chu changkanna a nih thu a sawi bawk. Zirna ngai pawimawh ram leh khua apiang an dingchhuak thin tiin khawtlang tanrualna a pawimawh hle a ti a. Ram leh Hnam a puitlin a, a dinchhuah zel nan Zirtirtute, sawrkar leh khawtlang hruaitute tanrual a pawimawh hle tiin thawhhona kawngah tan la zual turin a fuih a ni. Zirtirtute chu zirlai naupangte fuiha, puitlinna kawng zawh tura fuihtu ni zel turin a chah bawk. Khuallian chuan zirlai naupangte chu mahni thawh rah leh tuh rah zel seng tur a nih thu hre reng tura chahin zirtirtute zah a, an thu awih fo turin a fuih bawk a, Vawiin a Teachers’ Day programme chuan naupangte nungchangah rah tha chhuah se a duh thu a sawi bawk a ni.

Vawiin Teachers’ Day lawmnaah hian Hnahthial DEO/DPC Pu Micky Lalenkawla pawhin thu sawiin zirtirtu hna thawk mekte bakah thawk thinte chu zahna chibai a buk a, a thawk mekte chu harhtharna leh rilru thar nen thahnemngai taka thawk chhunzawm zel turin a fuih. Zirtirtu satliah chuan zirlaite a zirtir satliah a, zirtirtu pangngai chuan hrilhfiahin zirtirtu tha chuan entirna a pe thin a ti a. Zirtirtu ropui erawh chuan naupangte chu mitha ni tur leh thiamna tak tak nei turin phurna (inspire) a pe thin a ni a ti bawk. Zirtirtute chu fuihin ‘eng ang naupang nge kan chher chhuah’ tih in enlet fo thin turin a chah a, zirna kawng piah lamah naupangte nungchang tha leh mawi zirtirtu ni zel turin a chah a ni.

Teachers’ Day vawi 62na lawmna inkhawmah hian Hnahthial SDEO Pu Lalthlamuana Tochhawng chuan hun kaihruaiin Pu R. Lalchhandama Teacher Govt M/S chuan hunserh a hmang a, Dy DPC, Samagra Shiksha Hnahthial Pu Lalzarliana chuan lawmthu sawiin hun tawp a khar a ni. School Education Minister thuchah chhiarchhuahna neih ni bawk in Miss Betseby VL Tanpuii chuan a chhiar chhuak a ni. Zirlaite hnen atangin Special item hrang hrang enho niin hun hlimawm tak hman a ni. Vawiin Teachers’ Day lawmna ah hian District Education Office Hnahthial ruahmannain Kum 2022-2023 chhunga Hnahthial District a Zirtirtu tha ber (Teacher of the Year Award 2022-23) sem niin Pu H Zodingpuia Teacher, Govt High School chu thlan niin thuziak bakah pawisa fai hlan nghal a ni.

Dr. Sarvepalli Radhakrishnan, India ram President 2-na, zirtirtu ropui leh mithiam piancham September ni 5, 1888 hi 'Zirtirtute Ni ‘ atan hman thin a ni a. Kum 1962 atang khan India ram pumpuiah he ni ropui tak hi urhsun taka hman thin a ni.