1761/2023-2024

Khawzawl, 5th September 2023: India Vice President hmasa ber Dr Sarvepalli Radhakrishnan-a pianchampha puala kumtina neih thin ‘Zirtirtute Ni - Teachers’ Day’ chu vawiin khan ropui takin ram pumah lawm a ni a. Khawzawl District-ah chuan Khawzawl Zaingen Veng Hall-ah a lawmna pui ber hi neih a ni a, Addl DC Pu Lalfakzuala chuan khuallian niin he hun hi a hmanpui.

Khuallian Pu Lalfakzuala chuan thu sawiin Khawzawl District-a zirtirtu te chu zahna chibai a buk a, zirtirtute ni pualin duhsakna a hlan thu a sawi. Zirtirtu tha chuan zirlaiteah hriatna dik leh nungchang tha a tuh thin a ni, a ti a. Zirlaite nunah hriatna, finna, thiamna leh nungchang tha tuh nawn mawlh mawlh turin zirtirtute chu a chah. Khawzawl District-in khawtlang leh ram tana mi hlawhtling tam tak a lo hrin chhuah chherchhuaktute hi zirtirtute an nih angin zah leh chawimawi an phu tak zet a ni, a ti bawk.

Additional DC chuan zirtirtute chu mi thiam (educated) an nih angin incheina, nungchang leh thu sawiah te an fimkhur a ngai tak zet a ni, a ti a. Zirtirtute nundan chu zirlai ten an ngaisangin an chik ru a ni tih hria a, zirlaite ngaihsanna ang hu zirtirna pek chhuah tum turin a chah a. Naupangte hlawhtlinna leh ram hma hun chu zirtirtute kutah thui tak a innghat a ni, a ti.

Khawzawl Joint Village Council Chairman, Pu K. Vanlalsiama pawhin he hunah hian thu sawiin zirtirtu tel lo a mihring awm dan tur chu ngaihtuah tham tak ni a a hriat thu a sawi a. Mi puitling leh pangngaia zirlaite chherchhuaktu zirtirtute chu fakawm a tih thu leh, chawimawi leh zah an phu tak zet a tih thu a sawi bawk. Zirlai chhungkaw dinhmun inang lo tak tak kalkhawmte chu hmangaihna nena lo enkawl zel tur leh mi hmantlak an nih theihna tura thahnemngai taka lo zirtir zel turin a ngen nghal a ni.

Zirtirtute ni lawmna hunah hian Khawzawl District chhunga State Teachers Award lo dawng tawh mi pahnih - Pu B. Lalzethanga, Headmaster (Rtd), Govt. Modern Middle School, Khawzawl leh Pu B. Lalrintluanga, Headmaster (Rtd), Govt Kawlkulh PS - I te hnenah chawimawina hlan a ni a. Pu B. Lalzethanga leh Pu B. Lalrintluanga te hian kum 2004 leh 2010 khan zirtirtu tha chawimawina - ‘State Teachers Award’ hi an lo dawng tawh a ni.

Zirtirtute Ni hmanna hun hi Khawzawl District Education Officer (DEO), Pu Lalsikula chuan a kaihruai a; Education Minister Pu Lalchhandama Ralte leh Khawzawl DC Pu K. Lalrohlua te thuchah chhiar chhuahna hun hman niin, Khawzawl khaw chhunga sikul naupang ten an thiamthil hmuhnawm tak tak an entir a, Khawzawl Teachers Association (KTA) President Pu Lalhumhima chuan lawmthu sawina hun hmangin hun a khar. Khawzawl District Level Committee on Teachers’ Day in a lo rel tawh angin, chawhma lamah zirtirtute ni lawmna hi Khawzawl khawchhung school hrang hrangah Department hotu ten an an hmanpui a. District chhung khawdangah chuan Village Council te kaihhruaina hnuaiah hman a ni.