Vawiin khan ni hnih awh Chief Minister’s Running Trophy in YMA Cultural Dance Competition vawi 11-na chu Hawla Indoor Stadium, Republic Vengthlang-ah kharna leh lawmman semna hun hman a ni a. Art &Culture Minister Pu PC Zoram Sangliana chu khuallian niin Art&Culture Secretary Pu C Thatkunga chu khualzahawm a ni.
Pu PC Zoram Sangliana chuan hnam lam intihsiak buatsaihin a tum ber chu Mizo nunphung leh nun zemawi chawi nung zel chunga Mizo hnam lam mawi leh hlu takte a taka hmuh tir leh thiam tir a ni, a ti a. Hnamzia leh nundanphung hriat thar leh nan a sawia sawi a tawk lova, mit ngeia hmuh theiha lantir a tul a, chumi tihhlawhtling tura YMA member sang chuang ten Mizo hnam lam mawi tak an entir chuan Mizote hmalam enzia a tilang a ni, a ti. Art & Culture Minister chuan Mizo hnam dinchhuah nan leh inpumkhat zelna turin Mizo nihnaah lungawi tlan a tul a, tangrual leh inzawmkhawm thiamlo hnam chu a boral thin tiin Kristian zirtirna milin kan hnam zia rang chhawm nun zel tlak - aia upa zah te, midangte tanpui thin hnam kan nihnate leh tlawmngaihnate vawng nung zel turin kalkhawmte a sawm a. Hnam changkang leh puitling zawkte chuan an ram leh hnam chanchin thui tak chhuiin ziakin an dahtha thin a, chuvangin thiamna hmanga hmalam kan pan mek lai hian thiamna bawk hmanga hnunglam kan chhui char char a tul a ni, Pu PC Zoram Sangliana chuan a ti.
Art & Culture Secretary Pu C Thatkunga chuan Mizo hnam lam leh hnam nun zemawi kan neihte hi intihchangkansan lo tura YMA member-te chahin hnam humhalhna kawnga an hmalaknaah dingnghet zel turin a sawm a. Chief Minister’s Running Trophy in YMA Cultural Dance Competition a tel zawng zawngte leh mawhphurhtuten an chanpual theuh tlin taka an hlen chhuah avangin lawmthu a sawi.
Central YMA President Pu T Sangkunga pawhin thu sawiin Mizo culture vawnghim tur chuan tute pawhin mawh kan phur theuh a ni, a ti a. Culture humhalh tura sorkar, YMA leh tlawmngai pawl dangte hmalakna chuan awmzia thui tak neiin hnam nunze mawi inzirtirna leh hnam incheina chawinun zel kawngah hma kan sawn hle nia a hriat thu a sawi a ni.
Chief Minister’s Running Trophy in YMA Cultural Dance Competition vawi 11-na ah hian YMA Branch 42 an tel a, Khuallam, Chai leh Cheraw-a inel a ni. Ramthar North Branch YMA chu a pumpuiah pakhatna niin cheng 50,000/-leh Trophy an dawng a, pahnihna Chanmari West Branch YMA chuan cheng 30,000/- leh trophy an dawng. Khuallam bikah ChanmariWest chupakhatna niin Chai leh Cheraw-ah Ramthar North Branch YMA chu pakhatna an ni. He intihsiaka tel zawng zawng hnenah participation prize cheng 10,000/- theuh leh a tithazual pathumna atanga sawmnate hnenah cheng 15,000/- theuh hlan an ni a. Intihsiaka member tel tam ber Chanmari West Branch YMA hnenah cheng 5000/- leh certificate hlan niin Aizawl khawpawn atanga tel Branch pasarihte hnenah cheng 3000/- theuh pek an ni bawk.
