Art & Culture Minister Pu P.C. Zoram Sangliana chuan hmasawnna reng reng ram leh hnam tana chhuanawm leh rotling pawh nise hnam ziarang, pipu chen atanga nunze mawi kan chhawm ti dal thei emaw chimral thei zawng an nih phawt chuan hmasawnna tluantlingah ngaih tur an ni lo, a ti. He thu hi vawiin chhuna I & PR Auditorium-a lehkhabu pakhat a tlangzarhna a a sawi a ni a. Minister chuan Pipu nunah thil ropui leh chhuanawm tak kan chhawm nun reng tlak pakhat chu hmeithai leh mi chanhai zawkte dawmkan duhna thinlung kan put thin hi a ni, a ti a. Hmeithai tih hi hrilhfiah dan hrang hrang a awm theih thu sawiin Mizo khawtlang nunah chuan pa tel lova nu in a tulpuite hmakhua dawmkan kan duhna thinlung hi a pawimawh ber fo tur chu a ni ang a ti a. Kuminah Chapchar Kut ropui leh hlimawm tak kristian culture nena inrem taka hman a ni thei ta te leh amah ngei pawhin Zirtawpni kalta March 8 khan Mizo ringtu hmasate Saitual Lal Dorawta’n a humhimna hmun khuaah ngei Chapchar Kut hlim taka a hmanpui leh thei chu thil chhinchhiah tlak tak a tlin thu a sawi bawk.

C. Lalhmangaihtluangi lehkhabu ziak ‘Hmeithai Fa Te Te Si’ tih lehkhabu bung 13, phek 260 a chhah - Hmeithai te dinhmun tarlanna leh an hmakhaw chungchanga inzirtirna lam hawi lehkhabu thar chu vawiin hian Minister hian a tlangzarh a, lehkhabu chhungthu thlirlawktu MAL Secretary Pu C. Chhuanvawra’n he lehkhabu tlangpui a sawizau a ni.