Ministry of Labour & Employment, Govt. of India Notification ni 30.10.2015 a chhuak hmangin Employees State Insurance (ESI) Act. chu Aizawl Municipality huam chhungah December ni 1, 2015 atang khan kalpui tan a nih tak avangin Mizoram chhungah mimal sumdawng, private establishment leh factories/industry-a hnathawktu sawm aia tam chhawrte chuan anmahni leh an mi chhawrte zawng zawng inziahluh (register) a lo tul ta a. Vawiin khan Labour Employment and Industrial Training Director Pu Lalhmachhuana hovin I&PR Conference Hall-ah ESI Act chungchang zirhona an nei a ni.
Pu Lalhmachhuana chuan ESI Act hnuaiah sawrkar laipui chuan Scheme for Promoting Registration of Employers and Employees (SPREE) a puang a, SPREE hnuaia inziaklut zawng zawngte chu sawrkarin hamthatna a thlawnin tam tak a pe chhuak dawn a ni, a ti a. SPREE hnuaia inziahluh hi mimal emaw sumdawngtute duhthlanna ni lovin, sawrkar laipuiin tih ngei tura dan a zam hnan tawh a nih avang leh hamthatna dawn tur tam tak a awm avangin sumdawngte leh an mi chhawrten ngai pawimawh turin a chah a ni.
Thla khata Rs. 21,000/- aia tam lo hlawh la thin te tan he scheme-ah hian inziahluh theih a ni a. Inziaklutte chu an dam loh emaw, nau an pai emaw, hnathawh avanga an piansual emaw, thihna hial emaw an tawhin anmahni leh an chhungten hamthatna an dawng thei a. An inenkawlna tur sum leh pai an tumsak piah lamah an chhungte tan hamthatna tam tak a awm a, rualbanlote tan Physical Rehabilitation te tih sakin thiam thil lama eizawnna tlak tura inzirtirna Skill Upgradation Training an tihsak thei a. Unemployment Allowance thlengin an pe thei a ni. Thla tin employees te hian an hlawh atangin 1% an chawi ang a, Employers-te hian 3% an chawi ve bawk ang a.
Registration hi online-in www.esic.in-ah inziahluh theih a ni a. December ni 20, 2016 atanga tanin March 31, 2017 thleng inziahluh theih a ni. Branch Office pawh tahrik ni 08.02.2016 ah hawngin, C-40, ITI VENG, AIZAWL, 796005, MIZORAM-ah Branch Manager Pu Bjeet Pegu leh Staff te nen dah nghal an ni a. Aizawl Camp Office enkawl turin Assitant Director/Liaison Officer Pu David Lalfakzuala dah a ni bawk. Hrechiang duh tan a thlawnin phone number - 1800112526 ah zawh fiah theih a ni.
SPREE zirhona programme-ah hian Assitant Director Pu David Lalfakzuala leh Mizoram State Health Care Society OSD Dr.Thanpara ten kalkhawmte an zir tir a ni.
