Vawiin khan Transport Minister Pu John Rotluangliana hovin I&PR Auditorium-ah 28th Road Safety Week hawn a ni a. Pu Lal Thanzara Heallth Minister chu he programme ah hian khualzahawm a ni.
Road Safety Week hawnna ah hian Transport Minister Pu John Rotluangliana khuallian chuan lirthei avanga chetsualna pung zel chu sawrkar laipui pawhin a vei thu sawiin Supreme Court Committee on Road Safety (SCCoRS) din anih tak dan leh Mizoram ah pawh Mizoram Road Safety Council din anih tawh thu a sawi a. He Council kaihhruaina hnuaiah hian District tinah District Road Safety Committee pawh din a nih tawh thu a sawi bawk.
Minister chuan kum thum liamta atanga vawiin ni thleng hian ni 6 dan zelah lirthei accident kaihhnawih avangin mi pakhat zel nunna chan awm ang a nih thu a sawi a. Lirtheia chetsualna tam zawk hi Driver-te fimkhur tawkloh vanga thleng niin tun aia fimkhur leh hawihhawm zawka lirthei kan khalh chuan harsatna tam zawk hi pumpelh theih anih thu a sawi a ni.
Pu John Rotluangliana chuan lirthei khalhtute chu Parking-ah te pawh mite tana harstana siamtu kan ni em tih inngaihtuah rengin, tun aia kan fimkhur hret chuan Road Safety Week kan hmang nghal ani a ti. Hmel ena mi pangai ni awm tak pumrua leh incheina ah vengva awm tak si traffic rules hrelo hmuh tur anla tam chu a zialo in kawngpui hman chungchangah nundan mawi zir ala ngaih hle thu a sawi. Zu leh lirthei khalh chu tih pawlh loh tur anih thu leh Road safety hi thinlungin kumtluana hmanga fimkhur turin Transport Minister chuan kalkhawmte a chah bawk.
He hunah hian Health Minister Pu Lal Thanzara Khual Zahawm pawhin thu sawiin Kalkawngte alo him zawk nan dawhtheihna leh hawihhawmna a pawimawh thu a sawi a. Minister chuan lirthei khalhtute chu road sign leh traffic rules ngaipawimawh tur leh, lirthei khalh laia mobile phone hman leh ruihtheihthil laka insum turin a chah. Aizawl Civil hospital –ah accident tawk ten awlsam zawka inenkawlna an dawn theih nan Trauma Centre siam tumin hma an lak mek thu Health Minister chuan a sawi bawk. Motor khalhtute Mizoram hmel ti langtu annih thu sawiin Pu Lal Thanzara chuan a bikin Taxi driver-te chu Mizoram rawn tlawhtu khualzin hrang hrangte phur kualtu annih avangin Mizoram hmel tilang tura an pawimawh thu leh an mawhphurhna a san thu a sawi a. Driver-te hawihhawm(polite) na leh midangte tanpui tura an inpekna hriattur leh hmuh tur awm thin chu lawmawm a tih thu a sawi bawk a ni.
He programme hi Pu H. Laizika Addl Secretary, Transport Department in a kaihruaia, Pu R. Remmawia, Director Transport Department in lawmthu sawina in hun a khar a ni.
Road safety Week vawi 28-na hi Mizoram States Road Safety Council buatsaih niin ni 6 February 2017 atanga hman tan a ni a ni 12 February 2017 thlenga hman tur a ni . Tukin zing khan Road safety Week atan hian 2 wheeler rally neih alo ni tawha, 2 wheeler 100 dawn lai an tel a ni.
Road Safety Week pual hian Transport Department leh Health Department te tangkawpin Ni 8 February 2017 ah hian Transport Department Conference Hall ah Lirthei Khalhtu te tan a thlawna mit entirna (Free Eye Clinic) hawn a ni dawn bawk a, TV-ah Panel Discussion Line Department te nen neih tum niin, Ni 11 February 2017 ah hian AIR –ah Live Phoning hun hman ani bawk ang.
