1587/2022-2023

Aizawl, 12th August, 2022 :  India Hockey player chhuanvawr Nl. Lalremsiami, Commonwealth Games-a Bronze Medalist chuan August ni 16 hian Mizoram a rawn lut dawn a. Lengpui airport-a amah lo hmuah dan tur leh an chenna Kolasib thlenga thlah dan tur chungchang ngaihtuahin vawiin khan Sports &Youth Affairs conference  centre, MINECO ah Pu T.C.Pachhunga SEDP Vice Chairman, Sports, Youth Affairs, ICT &Tourism Development Board hovin sawrkar department pawimawhte leh Sports Association hrang hrang hruaitute an thukhawm a.

Hmarchhak state zinga India ram aiawha Commonwealth Games a tel pha, infiammi tlemte zingah Jeremy Lalrinnunga leh Lalremsiami ten India ram tan Medal an rawn hawn hi an chhuanawmin ropui taka lo hmuah an phu a.  Amah Remsiami duh dan angin Lengpui airport atanga an chenna Kolasib khua pan nghal tur a nih avangin August ni 16 hian Lengpui airport ah chhun dar 12:30 p.m ah NGO te, Sports association hrang hrangte leh Press mite nen ropui taka hmuahna programme hmang turin ruahmanna siam a ni a. Mimal leh pawl anga lawmpuina thilpek  pe duhte tan pawh pekna hun remchang  siam a ni leh dawn a ni.  

Vawiina meeting ah hian Dr. Lalrozama Secretary Sports & Youth Affairs chuan Weightlifter Jeremy Lalrinnunga hmuahna ah Organising Committee a tel, sawrkar department te leh sports association hrang hrang te chungah leh Lengpui airport atanga Jeremy chenna Ainawn veng thlenga amah chawimawina programme a chanvo nei zawng zawng te chungah lawmthu a sawi a. Lalremsiami hmuahna tura inbuatsaihna ah pawh theihtawp chhuah țheih turin a ngen bawk a ni.

Attachment

  • Loading attachment...