3617/2022-2023
Aizawl, the 6th February 2023 : Vawiin khan Home Commissioner, Pu H. Lalengmawia, IAS, G20 Core Committee Chairman ni bawk hovin March ni 2 a Aizawl a G20 intawhkhawma chikhat – B20 Meeting March 1 leh ni 3 inkar a awm tur atana inpuahchahna leh inbuatsaihna hrang hrang te thlir hovin Secretariat Conference Hall MINECO ah an thukhawm.

Meeting kaihruaitu, Core Committee Chairman Pu H. Lalengmawia he intawhkhawmna atana inbuatsaihna leh inpuahchahna hrang hrang kalpui mek te a tha thawhkhat nia a hriat thu sawiin hengte hi amah hovin Core Committee chuan enzuiin an vil reng thu a sawi bawk a. Intawhkhawmna pawimawh dan leh a huhang hre theuh mah ila, Sub-Committee hrang hrangten an hmalakna reng reng chu Mizoram hmel lanna bakah India ram hmel lanna anih tel avangin an hmalak tawhna ah lawmthu hrilhin theihtawp chhuah zel turin a chah a ni.

Meeting ah hian Sub-Committee 9 te hma lakna leh ruahmanna theuh te, an hmachhawp leh hmabak te bakah harsatna an la neih te tarlan sawihona neih a ni. Sub-Committee hrang hrang te chu an huang chhunga hmalakna te a felfai zawk nan Check List siam vek nise tia thu rawn pek a ni.

Aizawl khawpui chhunga hrui inzam hnawk te senghawi leh tawnfel hna hi P & E Department ruahmanna hnuaia kalpui mek niin February ni 24 aia tlai lova a tlangpui zawhfel beisei a ni a. Sub-Committee on Beautification, Cleanliness and Hoarding/Banner chuan Lengpui atanga Aizawl kawng dungte tifaiin bawlhhlawh leh hnawmhnawk te senghawi/paih dan te an ruahman mek a, hemi bakah hian khawpui hmun hrang hranga a thei ang anga tihfai leh tihnum an ruahman mek bawk a. Hemi atan hian Local Council te thawhpuia sawmin February ni 18 leh ni 28 ah te Hnatlangpui an ko a ni.

Core Committee chuan Lengpui leh Aizawl kawng dunga chengte bakah Aizawl veng hrang hranga mipuite chu faina leh thianghlima kawnga hma lakpui a sawmin he intawhkhawmna a lokal tur ram dang palai ten Mizoram chu state fai leh thianghlim taka an hmuh theih nan leh an hawn theih nan an mahni zawnah theuh faina leh thianghlimna kawngah theihtawp chhuahpui turin a ngen a ni.

Tarlan tawh thin angin December ni 1, 2022 khan India chuan G20 Presidency kum khat atan a chelh tan a. India Presidency chhung hian ram chhung khawpui hrang hrang 50 ah meeting leh event chi hrang hrang 200 aia tam buatsaih a ni dawn. Mizoram in a thlen tur bik hi Business 20 meeting  tih niin a programme lian ber chu MZU Auditorium ah March ni 2 hian nilenga hman a ni dawn.