Vawiin khan Home Minister Pu R. Lalzirliana hovin a pisaah kum 2016 Krismas leh kumin Kumthar vuakveta Law & Order kenkawh dan leh halpuah hal khap thupek zawm anih dan te thlirletna neih a ni a. He thutkhawmah hian kumin chhunga hmalak zawm zel dan tur sawiho a ni bawk.

Home Minister chuan Dan leh venhimna kenkawh kawngah mawhphurtuten an hna an thawk tha viaua a hriat thu leh, motor accident leh zu ruih buai avanga khawtlanga buaina lian tham chhuak sawi tur a awmlo chu lawmawm a tih thu a sawi a. Tan lak ngaihna lai erawh a awm thu tarlangin, halpuah hal khapna dan sorkarin a tihchhuah chu district hrang hrangah zawm tha viau mahse Aizawlah bawhchhetu thenkhat an awm chu pawi a tih thu a sawi a. DC-in khapna order a chhuah hnua MPL final khelh tum leh Kumhlui thlah zana hmun thenkhat a hal a ni chu dan ngaihpawimawh lohna a nih thu sawiin, Home Minister chuan mipui him leh hlim tlan nana Sorkar thupek chhuahte chu zawm a nih theih nan Dan kengkawhtute mai bakah mipuite hriatthiamna leh tawiawmna a pawimawh thu a tarlang a. Krismas leh kumthar lo thleng leh turah pawh tun aia nasa zawkin sorkar leh ngo te tangho a mipui tawiawmna nen chak zawka law & order kalpui ni se a ti a. Magistrate-te, Police leh Excise & Narcotics Department ami te, AMC-te, YMA leh veng tina VDP, JAC leh check gate-a bungrua enfiah thintu taxation mi leh sa leh mawhphurhna chelhtu dang zawng zawng chungah Home Minister chuan lawmthu a sawi bawk a ni.

Vawiin review meeting-ah hian SP ten an district-a hmalak dan theuh report an pe a. Meeting chuan krismas leh kum thar vaukvetah mai bakah puja leh hun dangah pawh halpuah hal chu khap chhunzawm zel ni se tih a ni a. Halpuah hal in environment leh mihring taksa hriselna a thalo zawngin a nghawng theih dan te mipui ah leh a bik takin zirlaite zinga inhrilhhriatna kalpui theih ni se ti a rel a ni bawk.

Vawiin meeting-ah hian Home Department a hotute kalkhawmin, Aizawl DC leh AMC hotute bakah Central YMA hruaitute an tel a ni.