No.7218/2020-2021
Vawiin khan SAD Conference Hall, MINECO ah Home Minister Pu Lalchamliana hovin Krismas leh Kumthar vuak veta Sawrkarin halpuah, halmawi leh sky lantern te khapna thupek a tihchhuah bawhzui dan thlirletna review meeting neih a ni.
Meeting chuan Krismas laiin mipuiin halpuah leh halmawi an hal lo chu lawmawm tiin mipui hnenah lawmthu an sawi a; chutih rualin kum hlui thlah zana veng thenkhatin an hal miah loh laia veng thenkhata hal an awm chu pawi an ti a. Kumin Krismas leh Kumthar vuak vetah pawh sum leh pai khawhralna mai leh hriselna atana tha lo halpuah leh halmawi hal lo turin mipuite an ngen nghal a ni. Tumahin halpuah leh halmawi an hal tawh loh nan kumtir atangin Sawrkar leh CYMA tangkawpin a theih ang angin hma la se tiin meeting-ah hian rel a ni.
Home Minister chuan halpuah hal lohna veng leh a hal te mipui hriata an hming hmerha tarlang veng thenkhat te hnenah lawmman pek ni se tiin a rawt a, hemi atana hman tura ama Discretionary Fund atangin cheng 25,000 a thawh nghal thu a sawi. Hun lo awm leh zel turah halpuah leh halmawi khapna thupek te bawhzui turin Aizawl SP Office hnuaiah Cell din nise tih te, hetiang chungchanga zirtirna pe turin MKHC leh Synod Social Front-ah te ngenna siam ni se tih te, YMA Branch tinah inhrilhhriatna lam hawi awareness tun aia awmze nei zawka neih thin ni se tih te leh hemi kawnga veng thawk tha thlanchhuahna neih thin ni se tih te chu meeting ah hian rel a ni bawk.
2020 Krismas leh 2021 Kumthar vuak veta halpuah hal leh man thubuai (case) 22 Aizawl Police Station hrang hrangah ziah luh niin heng zinga 17 te chu halpuah hal thubuai niin a dang 5 te chu halpuah mansak thubuai te an ni a, halpuah leh halmawi nuai khat man hu Police ten an man bawk a ni. Henga inhnamhnawih mi 28 te chu thubuai siamsak an ni a, chargesheet pawh thehluh a ni tawh a. Nikum hmasaa hetiang thubuai 9 ziahluhah mi 6 te chu hrem an lo ni tawh bawk a. Fire & Emergency Services chhinchhiah danin halpuah leh halmawi avanga Krismas leh Kumthar vuak veta kangmei chhuak sawitham a awm lo niin meeting-ah hian tarlan a ni bawk. Police lam pawhin kum dang aiin boruak a ralmuan thu leh buaina liamtham engmah Mizoram khawi hmunah mah a chhuah loh thu meeting-ah hian an sawi lang bawk a ni.
Meeting ah hian Home Secretary Pi Lalbiaksangi, Addl. DGP Pu LH Shanliana, Aizawl DC leh SP te, Fire and Emergency Services hotute leh CYMA hruaitute an tel a ni.
