No.7217/2020-2021
Vawiin khan Labour Employment, Skill Development and Entrepreneurship (LESDE) changtu Minister Pu Lalchhandama Ralte chuan Aijal Club-ah Mizoram Youth Commission (MYC) hmalakna Livelihood Generation for Returned Migrant Workers due to COVID-19 phase-II a hawng.
LESDE Minister Pu Lalchhandama Ralte chuan hri avanga khawvel pum a tal buai mek laiin MYC chu Mizoram thalaite tan a ding reng a, an tangkaizia kan hmu chho zel a ni, a ti. MYC hmalakna zingah hna zawng mekte tana Hna Inpui job portal an siam te, All India Service a Mizo thalaite an tlin ve theihna tura Delhi coaching institute thaa Mizo thalai thiam rual tir tura hma an lakna te a fak a. COVID-19 hrileng avanga ram hrang hranga Mizoram mi leh sa hna thawk mek te an hna chhunzawm thei loa lo haw te tuamhlawm tura MYC hmalakna Livelihood Generation for Returned Migrant Workers due to COVID-19 thawh hnihna hawn a ni leh ta chu lawmawm a tih thu Minister chuan a sawi. Pu Lalchhandama Ralte chuan MYC-in migrant worker ten eizawnna an neih theihna tura training a buatsaih chu taima taka zira, hlawhtlinpui ngei tura tang turin a fuih a. Ram danga an awm laia an eizawnna thin te nen inang lo mahse an talent neih te haichhuak a, midangte tan pawha entawntlak khawpa tan la turin a fuih. Mahni district theuha MYC hmalakna bawhzui tur DC leh DC aiawhte chu sawrkarin migrant workers lo kir leh te tuamhlawmna kawnga hmalakna a ngaih pawimawhzia hriaa theihtawp chhuah turin LESDE Minister Pu Lalchhandama Ralte chuan a ngen bawk a ni.
MYC Chairman Dr Vanlaltanpuia pawhin thusawiin COVID-19 avanga mahni hnathawhna hmun tlansana an hnathawh thin bansan ta thalaite thlavang hauh turin MYC in tan a la tih a sawi a. Hna chan ta te tana eizawnna kawng dap turin NEC ah project an thehlut a, chuta tang chuan Livelihood Generation for Returned Migrant Workers due to COVID-19 hi a lo piang ta a ni, a ti. Chief Minister Pu Zoramthanga hovin he hmalakna thawhkhatna hi kalpui tan a lo ni tawh tih sawiin MYC Chairman chuan thawhkhatna kal mek hi February thlaah a zo dawn a, a thawhhnihna hi kumin July thlaa zo tur niin Mizorama District tinah training kalpui a ni ang, a ti.
He project thawhhnihna atan hian MYC chuan NEC atangin cheng nuai 270 hmuin migrant workers mi 780 te tan skill training chi li - cement mistiri, piggery, food processing leh cake baking te buatsaih a ni ang. Mizoram chhunga district tin Deputy Commissioner te kaltlanga training hi kalpui tur a ni a. Cement mistiri training chu District 11-ah, piggery farming district 6-ah, bakery training district 5-ah, food processing training district 6-ah kalpui tur a ni a. Training zawh hnuah hian training chhuak te tan post training support siamsakin an hmanraw mamawh te an sem dawn bawk a ni.
Vawiin programme hi MYC Secretary Pu Donny Lalruatsanga’n a kaihruai a. MYC Under Secretary Pu H.Lalnunzuala chuan project kalpui dan tur tlangpui a tarlang a. Serchhip DC Pu Abishek, Khawzawl DC Pu Zothanmawia, Lawngtlai leh Mamit DC aiawhte bakah migrant workers aiawh te an tel a ni.
