Agriculture Minister Pu R.Lalzirliana chuan nimin khan a bial Tawi Constituency chhunga Agriculture Department hnuaia NLUP 3rd leh 4th Phase beneficiary te hnenah NLUP tanpuina second installment a sem.

NLUP semna hi Keifang Venglai Hall-ah nimin chawhma dar 11:00 khan buatsaih niin Thingsulthliah Community Hall-ah chawhnu dar 2:00 ah neih leh a ni a, NLUP semna hmuna NLUP dawngtu kalkhawmte hmaah thusawiin Pu Zira chuan NLUP 3rd leh 4th Phase thengin sem ani ta chu NLUP hi Programme naran anih loh zia leh a kaltluang ani tih tilangtu anih rualin a dawngtu lam ten pawisa dawn hi ngai ah kan nei ang tih a hlauhthawnawm thin a ti a, NLUP kum 5 chuang kalpui anih takah hian NLUP dawng zingah tanpuina sum hmuh inzat theuh si a titha leh titha lo an hriathran tann tawh hle a ni a ti a,NLUP tanpuina sum dawngtute zinga mithenkhat an sum dawn te peipun tum miahlova thil danga hmang an awm thin a, chutiang mi te chu hun a kal deuh ang a an harsat ngaiin an harsa reng ang tih a hlauhawm a, an hman that duh loh chuan anmahni bak a tuar tur an awmlova, an sum dawn te an peipun thiam chuan an mamawh dang zawng zawng a phuhru thung dawn ani a ti bawk. Minister chuan NEDP Mizoram sawrkarin a kalpui tan dawn a, hetah hian NLUP a titha mitaima leh anihna ang taka hmangtute chhawmdawl chhoh zel an ni dawn a ti a, NLUP tanpuina chu political party emaw, pawl emaw sawilovin a dawng tur awm te pek zel an ni a, a dawngtute pawhin pawl rilru pu lova Mizo kan nihna ang zawka thil thui tak thlir chunga hlawhtlin pui tum turin rilru kan siam a tul a ni a ti bawk.

Agriculture Department hian tun tumah hian Tawi cluster a NLUP 3rd leh 4th Phase beneficiary te hnenah 2nd installment hi an sem a, khaw 15 a beneficiary 140 hnenah tanpuina Rs. 60,25,000/- sem a ni a, WRC-I thlangtu mi 60 hnenah Rs 45,000/- theuh, WRC-II thlangtu mi 75 hnenah Rs. 44,000/- theuh, Sugarcane (Fu) thlangtu mi 5 hnenah Rs. 32,000/- theuh sem a ni.

Keifang Venglai Hall-ah hian khaw 12 – Keifang, Lenchim, Maite, Mualpheng, Ruallung, Rulchawm, Saitual, Tawizo, Dilkhan, North Lungpher, Sihfa leh Tualbung atang beneficiary 125 hnenah tanpuina sem a ni a, Thingsulthliah Community Hall-ah hian Thingsulthliah, Thingsul Tlangnuam leh Seling-a beneficiary 15 hnenah tanpuina hi sem a ni bawk.

Nimina NLUP sem ah hian 3rd phase beneficiary 95 (WRC-I 40, WRC-II 51, Sugarcane- 4) leh 4th Phase beneficiary 45 (WRC-I 20, WRC-II 24, Sugarcane- 1) an awm a ni.