Home Minister Pu R.Lalzirliana chuan vawiin chawhma dar 10:00 khan Keifangah District Higher Secondary School sakna tur lungphum a phum.

Home Minister chuan District Higher Secondary School sak anih theihna tura theihtawp chhuahtu Keifang leh Rulchawm khawtlang hruaitute inpekna leh thahnemngaihna chu fakin anni bakah Keifang leh Rulchawm khaw mipuite inlungrualna vang liau liau a District Higher Secondary School chu puitling tur ani tih a sawi a, Keifang Higher Secondary School leh Rulchawm Higher Secondary School chhunfin ani thei tur chu lawmawm a tih thu sawiin zirtirtu pawh an indaih zawk thei dawn a ni a ti a, zirlaite tan pawh kawng zau zawk a inhawn theih phah ngei a beisei thu a sawi bawk.

District Higher Secondary School sakna hmun hi Keifang leh Rulchawm inrina ah a ni a, Keifang leh Rulchawm khawtlang remtihna in Keifang Higher Secondary School leh Rulchawm Higher Secondary School chhunfin tur a ni. School sakna hmun hi Pu Lalbiaktluanga, Ramhlun North, Aizawl ami ram niin a ram hi Rs nuaih 10 a leisak a ni a, Home Minister hian Pu Lalbiaktluanga hnenah hian ram leina pawisa chu lungphum phum rual hian a hlan nghal a ni.

District Higher Secondary School hi IDMI, Government of India Scheme leh MLA Local Area Development Works tangkawp atanga sak tur a ni a, MLALADS atang Rs. Nuaih 10 leh IDMI atang Rs nuaih 13 tunah hian hmuh tawh a ni a, NECS in building sak hna hi an thawk dawn a ni. NECS engineer te chuan building sakna tur sum hi Rs nuaih 7 vel hmuh belh an la inbeisei thu an sawi a, Sawrkar Laipui atanga sanction an hmuh atanga kum khat chhunga sak zawh an tum thu an sawi bawk.