3399/2024-2025

Champhai, 6th December 2024: Vawiin khan Champhai Zote chuan an khaw kum 125 tlin lawmna hun an hmang a. He hun hi an khaw chhuak, Home Minister Pu K. Sapdanga chuan khuallian niin a hmanpui a. Champhai  Bawrhsap Pu VL Remliana chu khual zahawm a ni.

Zote Community Hall-a lawmna inkhawm neihah hian Pu K. Sapdanga chuan Zote khawtlangin an kawtchhuahah  chawimawina lung an phun sak chu amah leh an chhungkaw tan thil chhinchhiah tlak tak a ni tiin khawtlang mipuite chungah lawmthu a sawi a. Zote chu sawrkar hmasa ten theihtawpin an cheibawl tih a hriat theih thu pawh sawiin, Pu K. Sapdanga chuan mipuite duhsakna zarah Zote khua chei chhunzawm thei dinhmuna a ding ve chu lawmawm a tih thu a sawi a. Home Minister chuan ram rawngbawl tura a pen chhuahnaah Zote khaw mipuite leh khaw chhuakte ṭawiawmna nasa tak a dawng tih pawh sawiin, a chunga an ṭhatna zawng zawngah lawmthu a sawi a ni. 

Home Minister chuan Zote khaw ram chhunga sawrkar hmunhma pahnih Industrial Training Institute (ITI) leh Integrated Infrastructure Development Centre (IIDC) te chu a nihna tur ang tak leh ṭangkai zawka hman dan ngaihtuah a ṭul thu a sawi a. ITI chu ṭhalai kut themthiam te chher hriamna hmun anih theih nan a changtu LESDE Minister pawh a sawipui tawh thu leh tuna luah mektu raltlante pawh Champhai Sub Headquarters YMA ruahmanna angin sawn chhuah tum an nih thu a tarlang a ni. Pu K. Sapdanga hian IIDC leh ITI te sawrkarin tih phuisui a tum mekna kawngah Zote khawtlang, a bikin ṭhalaite chu an rilru lo hawng turin a ngen nghal bawk a ni. 

Khual zahawm Bawrhsap Pu VL Remliana pawhin thu sawiin, Champhai Zote khaw mipuite chu hun hmasa lama an dinhmun nen intehkhin a, changkanna leh hmasawnna kawng zawh zel turin a chah a. Sawrkar ruahmanna te tumna tak tak nen lo dawngsawng a, taimakna nena hna thawk turin a chah bawk. Pu VL Remliana chuan zirlaite chu taimakna leh tumruhna nena lehkha zir turin a fuih a, nu leh pa te pawh an fate lehkha zir thlawp thiam turin a ngen bawk a ni.

Zote khua kum 125 tlin lawmna hi Pu PC Rodawla, VCP, Organising Chairman ni bawk chuan a kaihruai a. He hunah hian Home Minister Pu K. Sapdanga chuan Zote khua kum 125-na puala Monument siam chu a hawng a, Souvenir a tlangzarh bawk. Champhai Bawrhsap Pu VL Remliana chuan  Pu K. Sapdanga chawimawina lungphun Zote khawtlang buatsaih chu a hawng a ni.