Vawiin khan   Home Minister Pu R. Lalzirliana’n Champhaiah  Bazar Beat Post leh R.Chalbawia Junction Police Check Gate, Khankawnte a hawng.

Home Minister chuan Champhai khawpui chhung Bazar hmuna Police Beat Post thar leh Champhai khawpui daia R.Chalbawia Junction Police Check Gate thar hawn a ni chu lawmawm a tih thu leh phal taka ram petu Pu R.Chalbawia te chhungkaw chungah lawmthu a sawi a. Champhai Khankawn hmuna Police Check Gate awm chu check gate pawimawh tak ramri kaltlanga suahsualna hrang hrangte lo endikna hmun a nih thu a sawi a. Police-te chu an hnathawhna apiangah rinawmna leh dikna vawng nung tlat thin tura fuihin,   Khankawn Police Check Gate-a duty thinte pawh dik tak leh rinawm taka hnathawk turin a chah a. Police chu inthununna tha tak hnuaia awm anih avangin inthlahdah a thianglo a ni, a ti a. Police hotu thenkhat mahni hnuaia hnathawkte dan lo anga chhawrlui  awm thin pawh tih rem zel anih thu leh hrem ngaite pawh hrem an nih thin thu a sawi a. Diklo taka sum lak luh bansana, diklo leh thalo te chu thliar hranga dan hmanga mana hremna pek zel tur a ni, a ti a.  Mizoram Police te chu India ram Police  chhuanawm leh tha ber khawi hmun pawha duty inhuam reng an ni chu fakawm a tih thu a sawi bawk  a. Beat Post leh Check Gate hawn tharte chu anihna ang taka hmang anih theihna tur leh tangkai taka hman anih theihna turin thawktute a chah bawk a ni.

He hun hi Pu Lalbiakkila, Addl SP Champhai chuan a kaihruai a, Khankawn Police Check Gate hnathawh leh tangkainate a sawilang a. Phal taka ram petu Pu R.Chalbawia, Champhai Vengthlang pawhin thu a sawi a. Pu Lalengliana Chhangte, DSP (Hqtrs) Champhai in lawmthu sawina neiin  hun a khar a ni.

Bazar Beat Post, Rahsi Veng ami hi BADP sum cheng nuai 20 senga sak niin, a dung feet 39 leh a vang feet 39 a zau a ni. R.Chalbawia Junction Police Check Gate, Khankawn a mi hi BADP sum cheng nuai 15 senga sak niin, a dung feet 36 leh a vang feet 24 a zau a ni a, darkar 24 duty na hmun anih angin khum 3 leh eirawngbawlna te pawh dah tel a ni bawk.

Khankawn Police Check Gate tia hriat tuna R.Chalbawia Junction Police Check Gate vuah tak hi kum 2004 atanga hman tan a ni a. Kumi bikah June thla thleng khan Case 12 ziahluh tawh a ni a. Ganja, Heroin, Rangkachak, Ralthuam leh thil dangte pawh man a lo ni   tawh thin a ni.  Tun thlenga hemi Gate-a thil man hlut zawng belhkhawm hi cheng vaibelchhe 10.69 hu vel zet a ni.