Vawiin chawhma dar 11:00 khan Police Training Centre (PTC) Parade Ground-ah Mizoram Police 1st  Batch Commando Training kharna inkhawm neih a  ni a, Home Minister Pu. R.Lalzirliana chuan khuallian niin a hmanpui.

Khuallian chuan ni chhinchhiahtlak, ram leh hnam chhantu turte hlawhtling taka an training zawhni hman a ni chu lawmawm a tih thu sawiin,  26th  November, 2008-a Terrorist-ten Mumbai khawpui an beih nghawng zelah Sawrkar laipui hotuten hetiang thil a lo thlen leh palh huna rang taka chet a nih theih nan State tin-ah Commando Company hnih theuh din tura thu a chhuah chu kan State ah pawh tihhlawhtlinin a awm ve ta a ni a ti a, inpekna nen chuan remna leh muanna awmna ramah hian awmze neiin hna thawh theih a ni a ti bawk.

Commando Training chhuakte chu fuihin Home Minister chuan sualna leh buaina siamtute rang taka man chhuaka tudawl turin a rintawk thu te, uluk taka invawng tur leh mahni inrintawkna neia, rilru huaisenna leh tumruhna nen mizo tlangval diktak rilru an put phawt chuan ram leh hnam chhan turin an tling tawk a ni, a ti a, an thawhrimna leh inpekna azarah rilru thlamuang takin mizo mipuite an awm thei dawn a ni a ti bawk.

Home Minister chuan Commando train chhuakte chu ralthuam tha lehzuala thuam an nih tur thu sawiin training chhuakte chu an mawhphurhna san zia hre turin leh midang zinga intihtheihnan leh hleilen nana a nihna leh thiamnate hmang lo turin a chah bakah hetiang mi an awm anih chuan hremna na tak an chungah lek anih tur thu a sawi bawk.

Home Minister chuan Sorkar leh mipuite inkara inhriatthiamna tha tak a awm thu leh hemi tihmelhem leh tichhe tu a tang lo turin mi tin te a duh thu sawiin, Police ten tan an lak lai leh hnuhma tha tak an neih laia tunlaia ramchhunga thihna chi hrang hrang mak tak tak lo thleng thin avanga mualphona an tawk chu na a tih thu a sawi a, hengahte hian a tidiklo leh tisualtu chu chhuichhuak ngei turin Police hotute pawh a hrilh nawn leh nghal bawk a ni.

Home Minister hian Commando training zote hnenah hian Certificate a hlan a, training chhunga titha zual thlan chhuah mi pali hnenah Certificate leh medal a hlan bawk, chung mite chu :
    Best in Tactics        :    S.I. K.Lalthlamuana 5th IR Bn.
    Best in Shooting        :    Const 24 F.Lalmalsawma 5th IR Bn.
    Best in Endurance        :    Const. 257 James Ramfangzauva 5th IR Bn.
    Best in Written Test    :    Const 540 Zonunsanga Ralte 5th IR Bn.

Mizoram Police  1st Batch Commando training hi May ni 10, 2010 atanga tan niin, training tur hian 4th IR leh 5th IR atangin sipai hrisel leh thothang tha kum 35 hnuai lam mi 59 ve ve thlan an ni a. Training hnuah taksa lam harsatna avangin mi 19 an Battalian-ah thawn kir an niin, an aiawh tur mi 15 lut lehin a tawp thlenga Training tha taka titluan chhuakte hi mi 114 an ni.

Training chhung hi ni 52 (Chawlhkar 8) a ni a, thawhtanni atanga inrinni thleng niin Sawrkar chawl-ah pawh an awl ngai lo a ni.

1st Batch Commando Training kharna inkhawm hi Pu L.Hrangnawna IPS DIG (NR & TRG) in a kaihruaia, Pu L.R. Dingliana Sailo MPS, Principal PTC-in Course Report pe in, Pu Lalrokhuma Pachuau IPS DGP Mizoram pawhin thu a sawi bawk a ni.

Home Minister hi Health & Family Welfare Minister Pu Lalrinliana Sailo, I&PR Minister Pu Zodintluanga leh Parliamentary Secretary Pu Lalrinmawia Ralte-ten an tawiawm a, anni bakah hian Mizoram Police hotu liante leh thuthar lakhawmtute an kal tha hle a ni.

Inkhawm zawh hian Commando ten an thil zir-te lemchangin an entir (Practical Live Demonstration) nghal bawk a ni.