Tukin khan Home Minister Pu Lalchamliana chuan District Jail Champhai tlawhin a enfiah. Home Minister hi Jail Superintendent Pu Zosangliana leh a thawhpuiten an lo dawngsawnga, Jail chhung hmunhmate fanpuiin Jail dinhmun leh mamawhte an lo thlen a. Home Minister hian Jail tangte ruaithehna tur Jail Superintendent kutah a hlan a ni.

Home Minister chuan sawrkar ruahmannain Jail chu insiamthatna hmun, Jail tang ten a theih chin china  thiamthil an zir leh eizawnna ngelnghet an neih theihna tur lamhawia kalpui tura ngaihtuahna sen a ni, a ti a. Mizoram hmun hrang hranga Jail dinhmun leh mamawhte sawrkarin a hriat reng thu leh a tul ang zela bawhzui a nih thu a sawi a.  Jail tang mekte chu nun pangai tak an neih leh theihna tura  inenfiaha insiamthat tum tur leh,   khawtlang leh ram tana tangkai leh chhawrnahawm tak nih tum tura ngaihtuahna seng turin a chah a ni.

Home Minister Pu Lalchamliana hi Champhai Bawrhsap Pu Alexander V.Chongthu, Pu Francis Lalnuntluanga Ralte, Addl SP leh Official dangten an tawiawm a ni.