Vawiin khan Lawngtlai DC Conference Hall-ah Vigilance Awareness Week, 2019 pualin hun hman a ni.

He hun hi Lawngtlai Bawrhsap Pi Shashanka Ala, IAS chuan kaihruaiin, kal khawmte lawmna thu a sawi a. Hna thawhna hmun leh ni tin nunah rinawmna kan nunpui chuan hlemhletnain min tibuai pha ngai lo vang tiin, officer kal khawmte chu dik taka hna thawk a, duhamna inbawih behtir lo turin a chah.

He hunah hian Lawngtlaia state sawrkar leh Lai Autonomous District Council (LADC) hnuaia officer-te an kal khawm a. Mizoram sawrkar Vigilance Department hnuaia Anti-Corruption Bureau (ACB)-a Inspector, Pu Jerry Lalrinsanga chuan hlemhletna leh ei ruk do chungchang leh thil dik lo hai lang tura ACB hna thawh dan te a sawi fiah a. Additional Superintendent of Police Pu C. Lalruatkima kaihhruaiin kal khawmte'n rinawmna nunpui turin thu an tiam a. Election Officer Pu Lalremruata Sailo chuan lawm thu sawiin, hun khar a ni.

Vigilance Awareness Week hi sawrkar laipuia Central Vigilance Commission thu angin kum tin Sardar Vallabhbhai Patel-a piancham (October ni 31) chhung khungin hman thin a ni a. Hlemhletna leh ei rukna tibo tur leh a laka inthiar fihlim tura inzirtir tharna leh intiam tharna atan hman thin a ni. Kumin hian October ni 28 atanga November ni 2 thleng he chawlhkar hi hman tur niin, thupuiah 'Integrity - A Way of Life (Rinawmna - Nunphunga Neih)' tih chu hman a ni.