Vawiin chawhma khan Pu Lalchamliana, Home Minister chuan District Jail, Kolasibah mi 32 awm theihna tur a sak Male Barrack a hawng a, District jail te fangkualin thawktute leh Jail tangte kawmna hun a hmang.

Home minister chuan tangte fuihna hun a hmang a, Jail-a an awm chhungin insiamthat tum a tangkai tak a an hun te hmang thin tur a chahin Mizoram sawrkarin Jail chu tangte hremna ni lovin tangte tan a insiamthatna hun tha leh enzawnna tlak thiamthil an zirchhuah theihna hmun ni turin hma a lak mek thu a sawi. Minister chuan Jail tangten mamawh hrang hrang an lo thlen te enpuiin a tul anga hma lak a nih tur thu a sawi a, Jail tangte chu dan in a phal loh thil ti nawn tawh lo turin a fuihin hmalam hun eng zawk an neih theih nan nun kawng dik zawh tur in a chah bawk.
District Jail, Kolasib Male Barrack hawnna hun hi Pi Maria CT Zuali, IG Prisons in kaihruaiin District Jail a tangte tan Sawrkar department dangte nen thawk hova eizawnna atan a tangkai tur inzirtirna kalpui a nih tur thu a sawi a, SIRD te nen tangkawp a zirtirna pe turin ruahmanna a kal mek thu a tarlang bawk.

District Jail, Kolasibah hi tang 114 awm thei tur a sak niin mipa 98 leh hmeichhia 16 awm theihna hmun duan a ni. Tunah hian tang 133 awm mekin chung zing 4 te chu hmeichhia an ni a, rukruk vanga tang tan berin 56 an awm a, ND&PS Act hnuaia man mi 29 an awm bawk a ni.

Minister hian Fire & Emergency Service Station, Kolasib tlawh in thawktute a kawm a, an hnathawh dan leh harsatna awm te sawi ho niin hmalak dan tur te rel a ni. Home minister hi Pu Vanlalfaka Ralte, SP, Kolasib leh Pu Ruatsanga Ralte, SP, Fire & Emergency Services ten an tawiawm a ni.

Pu VL Ruala, Leading Fireman in a tarlan danin kum 2019 chhung khan Kolasib khaw chhungah in kang 2 leh ram kang 9 thelhin an che chhuak a, Motor lian gas leh POL phur chesual ven ngai a awm thin thu a sawi bawk. Fire Station Kolasibah hian Fire Tender motor tui litre 3500 leh 2800 phur thei awmin tanky tui litre sing 5 dah khawl theihna a awm bawk a ni. Fire emergency number 101 a that rih loh avangin kangmei thelh ngai in hrilhhriatna kawngah Phone number 03837-222322 emaw 7627966100 ah biak pawh tur a ni.