Fire Prevention Week 2018 hawnna inkhawm chu vawiin khan ATI Conference Hall-ah State Level Fire Prevention Committee bultuma buatsaih a ni a. Home Minister Pu R.Lalzirliana chu khuallian niin he hunah hian Co-operation Minister Pi Vanlalawmpuii Chawngthu, Govt. Deputy Chief Whip Pu RL Pianmawia, Law Commission Chairman Pu John Siamkunga, ZIDCO Chairman Pu Lalrobiaka bakah MLA dang pali Lt.Col.Z.S.Zuala, Pu Hmingdailova Khiangte, Pu K.Lalrinthanga leh Pu R.Vanlalvena te an tel a ni. Kumin Fire Prevention Week hi February 12 atanga 17 chhung neih tur niin thupuiah “Ram tikang lo turin mitin i fimkhur ang u” tih chu thlan a ni.

Khuallian Pu R.Lalzirliana chuan Fire Prevention Week hi ram chhungah kangmei a chhuah lohna tura inven fimkhur a tulzia inzirtirna hun a ni a, kangmei laka invenna tak tak erawh hemi bak February atanga May/June thla thleng, thal chhung zawng kan chhunzawm a tul a ni, a ti. Mahni lo vah hal hi ram kang a ni lova, fimkhur taka kan lo vah kan hal chuan ram kang lakah kan inveng thei, tih sawiin pipu atang tawha lo vata hal thin Mizo mipuite chu fimkhur leh ram tihkan hlau taka, mei kawng uluk taka sial chunga lo hal thin turin a chah a. Ram kang hian mihringte nunna hnar, boruak tha siama boruak chhia eiral tu leh tuihna min siam saktu ram ngaw a ti chereu a, nungcha a ti hlum a, kan chak lakna ber kan tichhia tih hriat a tul, a ti. Pu R.Lalzirliana chuan ram ngaw kan humhalh loh chuan tui hna a kang chat ang a, tui sem tur leh chawi tur a tlem tial tial dawn tiin tun dinhmunah thal laiin Mizorama lui liante a kam nasa tawh hle, niin a sawi a. Tuikhur leh lui dunga ram ngaw te phei chu humhalh nasat lehzual a tul thu sawiin sawrkar, tlawmngai pawl leh kohhrante pawhin hma nasa takin la mek mahsela a ram neitu, Mizo mipuiten kan zawm that loh chuan kan ram neihchhun kan tichhia ang a, a tuartu chu keimahni vek hi kan ni leh dawn a ni, Home Minister chuan a ti.

Principal Chief Conservator of Forests Pu Lalram Thanga, State Level Fire Prevention Committee Member Secretary ni bawk chuan Mizoram chu India ramah Chief Minister kaihhruaina hnuaia State Level Fire Prevention Committee din thei awm chhun niin sawrkar laipui pawhin a fak niin a sawi a. Fire Prevention Week ah hian kangmei a chhuah lohna tura inzirtirna ngawrh taka kalpui thin niin  Aizawl bakah District khawpui tinah DC te kaihhruaiin Fire Prevention Week hi hman a ni, a ti. Ramngaw chu ei tur, in tur, chakkhai lamna, boruak tha siamtu leh tuihna min siamsaktu a nih avangin kan  humhalh tur a ni a, thal hun chhung a rei lo hle chung pawha Mizoramah kum tin ram a kang ziah chu a pawi hle tih sawiin mi tinte fimkhur leh zual tur leh sawrkarin kan himna tura dan a siamte zawm turin Pu Lalram Thanga chuan mipuite a chah a ni.

State Level Fire Prevention Committee hi kum 2000 khan din niin State Level Forest Fire Crisis Management Group leh District Level Fire Crisis Management Group chu May, 2017-ah din a ni a. February ni 2, 2018 khan State Level Fire Prevention Committee thukhawm chuan Fire Prevention Week hman hun tur a ruat bakah March 15 aia tlai lovah lo hal zo vek turin mipuite a hriattir a.  Fire prevention inelna District tinah a buatsaih bawk.

Fire Prevention Week hawnna inkhawmah hian CCF (Admn.) leh Sub-Committee on State Level Fire Prevention Member Secretary ni lai Pu Lalthangliana Murray chuan report a pe a, Additional PCCF Pu Liandawla’n lawmthu sawiin hun hnung a khar a ni.