Vawiin khan MSU Rising Day vawi 17 na lawmna leh Zirna Uar kum hawnna Sub Hqrs YMA Conference Hall, Lunglei ah neih a ni. Pu S.Laldingliana, Vice Chairman, Lunglei High Powered Committee chu khuallian ni in a hmanpui.

He hun R.Lalhlimpuia, Vice President, MSU regional Hqrs Lunglei kaihhruaiah hian Pu S.Laldingliana chuan thu sawiin MSU chu zirlai tan leh Mizoram tan pawl tangkai tak a ni a, zirlai tan leh kan ram leh hnam tan tangkai taka kal zel turin duhsakna a hlan a. Zirna lamah Mizoram chhimlam kan tla hniam tawh hle a, tunhma chuan chhimlam hi zirna leh ram hruaina kawng a hmahruai tu kan ni thin a, chumi chu chhawm nung thar leh turin tan ila tlan ang u a ti.  Zirlaite chu Mizoram chhungah chauh hnathawh tum lovin All India Service nih tum a inpuahchah chho turin a fuih a. Ram leh hnam humhalh na tha ber chu zirna a ni a, zirna hmangin kan ram kan hnam kan humhalh thei turin zirna lam ah nasa tak a tan kan lak a ngai a ni a ti.

 A sawi chhunzawm zel na ah Pu S. Laldingliana chuan HPC hmangin Lunglei hmasawnna eng emawzat thawh tawh a ni a, thawh zel tum a nih thu sawiin, tun dinhmunah Lunglei Traffic Management hmasawnna tura tan an lak thu a sawi a. Traffic Point-ah te CCTV dah tuma hmalak mek a nih thu sawi bawk. Hei bakah hian Lunglei hmasawnna tura theihtawp chhuaha tang ho turin kalkhawmte a sawm a, thurawn nei te tan pawh thurawn dawng tura an inhawn reng thu a sawi bawk.

Biaksiamtluanga, President pawhin thusawiin, Lunglei hmangaihtu Pu S. Laldingliana, HPC Vice Chairman chu an chhuan thu leh Lunglei hmasawnna tura a hnathawh tam tak avangin an lawm thu a sawi. MSU chu zirlai pawl a nih angin, 'Zir Uar Kum' puan tak tihlawhtlingtu ni theuh turin zirlaite a sawm a ni.

He hunah hian MSU Regn. Hqrs. Lunglei chuan an Advisers & Sr. Advisers, Legal Advisers te an vaiin mi 8 te Chawimawina hun  hmangin thuziak (Citation) an hlan theuh a ni.