Vawiin khan Taitesena Hall, venglai Kolasib ah Kolasib District Fire prevention Committee Chairman, Kolasib Bawrhsap ni bawk Pu R. Zarzosanga chuan Fire Prevention Week a hawng.

Pu R. Zarzosanga chuan thu sawiin ram kang in boruak chhia tipungin khua a ti lum tual tual a, leilung a tih khawro bawk ani tiin ram kang chu tunlai khawvela thil vei awm tak anih thu a tarlang. Khawvela Ram changkang leh hmasawn tak tak USA leh Europe te pawhin ram kang chu an buaipui thu sawiin Mizoram ah ngei pawh kumtin deuh thaw ram kang leh in kang a awm a hei hian khawtlang leh ramngaw tan harsatna nasa takin a thlen thin thu a sawi a, ram kang thelhmit chu Ram changkang tan pawha buaipui tham a tlin avangin ram kang tur venna kawngah nasa taka rilru kan sen a, a ti kang lo tura tan lak a ngaih thu a sawi a ni.

Kolasib District chu thlai leh thing chi hrang hrang tana hmun tha (Potential Area) a nih thu tarlangin heng Agriculture, Horticulture, Sericulture, Fisheries, Forestry leh a dangte that duhna hmun a nih angin ram ti kang lo tura hmalak a pawimawh lehzual a ni a ti a, Mizoram chhunga ram ti kang lo ber District ni tura tan lakpui turin kalkhawm te chu a sawm a. Hemi hlawhtlinna a tan hian NGO hrang hrangte leh Media chi hrang hrang te nena thawhho a pawimawh thu a sawi a, Print leh Visual Media bakah Social Media lamah pawh Ram kang ina a nghawng a tam zia leh ti kang lo tura tan lak a pawimawhzia te pawh tidarh tam turin kalkhawm te chu a chah a ni.

Kangmei laka invenna hapta hi Pu C.Liankunga, President Sub Hqrs YMA Kolasib in a kaihruaia, Pu C.Lalrinmuana, Forest Range Officer hnen atangin kangmei laka invenna kawnga hmalak dan tur chi hrang hrangte chu Power Point Presenation hmanga thlirho  a ni a, Pu ST Lalhmingmawia , District Local Administration Officer chuan lawmthu sawina in hawnna inkhawm hi a khar a ni. He hunah hian Kolasib chhunga Sawrkar hnathawk hrang hrang bakah NGO hrang hrang hruaitute an tel tha hle a ni.

Attachment

  • Loading attachment...