Road Safety vawi 29 na chu vawiin hian DC Conference Hall, Serchhip ah District Bawrhsap Pi Sangchhin Chinzah chuan a hawng.

Bawrhsap chuan thusawiin lirthei avanga chetsualna hrang hrang awm thei laka fimkhur chu mawhphurhna a ni a ti a. Kawngpui-a chetsualna thleng avangin nunna chan tam tak an awm tawh thu sawiin, heng chetsualna thleng thei laka kan him theihna turin lirthei khalhtute, a chuangte leh kawng-a kal te kan pawimawh theuh tih sawiin, a bik takin lirthei khalhtute leh ke-a kal mipui te kan fimkhur zual a tul thu a sawi. A huhova kawngpui-a kan kal dul dul thinte hian midangte tan harsatna a siam thin tih kan hriat a pawimawh thu a sawi bawk. 

He hunah hian Lalringdika, MPS Superintendent of Police, Serchhip District pawhin thu sawiin hetianga Hapta hawnna kan neih hi a bul tanna anih thu leh kumtluana inzirtirna kalpui tur a nih thu a sawi a. Khawvel thang chho zelah sualna chi hrang hrang a pun laiin Mizoram-ah kum 2016 aiin 2017-ah lirthei chetsualna vanga nunna chan nasa taka an tlahniam chu thil lawmawm tak a nih thu a sawi a. Sawrkar chuan lirthei chetsualna laka mipuite an him theihna turin ngaihnathiamna tel lova lirthei leh a khalhtute enfiahna hun te pawh hman thin anih thu sawiin, hei hian nasa takin chetsualna thleng tur a tih tlem phah nia an hriat thu a sawi a. Sawrkar in lirthei Document leh License felfai neih a ngaih pawimawh thu sawiin, lirthei document felfai leh license nei fel-ah chetsualna thleng a tlem thu leh accident zinga tam ber chu document felfai lo an nih thu a sawi a. Hei vang hian lirthei khalhtu ten document ngaih pawimawh a tul thu leh nu leh pa te pawhin an fate, kum tlinglo chu lirthei khalh tir loh tur a nih thu a sawi bawk.

Vawiina Road Safety Week hawnna hi Pu B. Lalrinsanga, District Transport Officer, Serchhip a kaihruai a, Serchhip-a Sawrkar Department hotu thenkhat te, Police leh Traffic lam thuneitute, MVI-a thawk te leh YMA Sub-Hqrs. hruaitute bakah zirlaite leh thuthar thehdarhtute an tel a. Road Safety Week hman chhung hian Serchhip-a lirthei zawng zawng endik hna thawh tum niin Serchhip-a Passenger phur thin lirthei khalhtute zawng zawng chu Week hman chhung hian Training pek vek tum an nih bakah Passenger phur lirthei (Maxi Cab, Taxi leh Auto Rickshaw) khalhtu tha ber thlanchhuah a ni dawn bawk a ni.

Attachment

  • Loading attachment...