Tukin khan Mamit Field vengah Pu H.Lalhmingliana, DTO, Mamit kaihhruaiin 29th Road Safety Week hawnna hun neih a ni a. He Week hi Mamit District Bawrhsap Pi Lalbiaksangi chuan a hawng.

He week hawngtu Pi Lalbiaksangi chuan Road Safety Week hi karkhat chauh awh a ni lova. Kumtluana hman a tul avangin a kharna hun pawh siam a ni ngai lo a ni a ti a. Driver Motor khalh thinte pawh ruilo hai lova, hawihhawmna nen motor khalh thin turin a chah.

Pu Naryan Thapa, SP Mamit pawhin Police Record-a a lan danin Road Safety Week hman thin anih avang hian chetsualna tam tak pawh a tlahniam sawt hle a ni a ti. Accident hi Mechanical failure leh Driver fimkhur tawk loh thin vanga thleng thin anih avangin Motor khalhtute leh Motor neitute chu an Motor dinhmun hrechianga chhiatna thlen lohna tura fimkhur thin turin a chah bawk a ni.

Dr.C.Zothankhuma, CMO, Mamit pawhin thu sawiin Accident lo thlen thulha chetlak dan leh a rang thei ang bera hliam tuarte enkawl dan tlangpui a sawi a. Tunah hian Accident hi mihringte thihna thlentu tam berte zinga mi anih avangin Motor te pawhin First Aid pai uar a, hliam tuar enkawl dan pawh lirthei khalhtute bakah mitinin kan inzir a pawimawh a ni a ti. Accident atanga hliam tuarte hi First Golden hour leh critical 4 Minutes chhung hian Medical First Aid dik tak pek chuan nunna tam tak a chhanhim theih thu a sawi bawk a ni.

29th Road Safety Week thupui atan hian "Fimkhur takin khalh la, nun chhanhim rawh" tih hman a ni a. Kalkhawm mipuite'n lirthei khalh fimkhur tura intiamna (Pledge) neih a ni bawk.

29th Road Safety Week hawnna hunah hian Mamit District chhunga Head of Offices, MJA, NGOs, khawtlang hruaitute bakah Driver Association hrang hrang an tel a ni.

 

Attachment

  • Loading attachment...