Vawiin khan Lunglei Police Station kawtzawlah 29th Road Safety Week, 2018 chu Bawrhsap Pi Lalzarmawii, IAS in a hawng.

Pi Lalzarmawii chuan sawrkar laipui Ministry of Road Transport and Highways in a zirchian danin India ram pumpuia lirthei chetsualna thleng za zela sawmsarih panga (75%) chu driver thiamloh vang leh driver fimkhur tawk loh vang a ni a, Mizoramah erawh chuan lirthei chetsualna za zela 95.5% chu driver te thiamloh vang a ni tiin hei hian Mizorama lirthei khalhtute kan la fimkhur tawk loh zia a ti lang chiang hle a ni, a ti a. Lirthei chetsual avanga mi tam takin an nunna hlu tak an chan thin chu pawi a tih thu sawiin  Lunglei DC chuan kumin Road Safety Week Thupui “Fimkhur Takin Khalh  La, Nun Chhanhim Rawh” tih chu week chhung chuaha hmang lovin engtiklai pawha an thinlunga vawng reng turin kalkhawmte a chah a ni.

 He hunah hian Lunglei District Additional SP Pu Lalchhuanthanga, MPS pawhin thu sawiin Lunglei khawpui thang zelah lirthei a pung a, kawngpui erawh a zau belh theih tawh lova, mitin te lirthei chetsualna laka kan him tlan theih nan lirthei khalhtuten dan zawm chunga dawhthei taka an khalh a tul a ni, a ti a. Kum kalta khan Lunglei District ah lirthei chetsualna case paruk (6) awmin mi pali (4) in nun an chan a ni tiin kumin chhungin lirthei chesual case a la awmloh thu a tarlang bawk. Lirthei khalh kaihhnawih dan leh hrai te Lunglei Police-ten khauh takin an kengkawh zel dawn a ni  a ti bawk.

Vawiin 29th Road Safety Week hawnna inkhawm hi Pi Saizikpuii, DTO Lunglei in a kaihruai a. He hapta pual hian Autorickshaw, Taxi leh Maxi-Cab Driver tha ber te an Association theuhin thlang chhuakin lawmman hlan an nih tur thu a tarlang a. Kumin chhungin school hrang hrang-ah Road Safety Awareness neih a nih tur thu a tarlawng bawk.

Road Safety Week hawnna ah hian Lungleia Zoram Drivers Union hotute, Driver Association hrang hrang hruaitute, District Officer-te  chanchinbumite leh tlawmngaipawl aiawhte an tel a ni.