District Road Safety Committee in alo ruahman angin Vawiin khan Kolasib Diakkawn ah 'Drive Safely, Save Lives' tih thupui hmangin Road Safety week vawi 29 na chu Pu C.Lalmalsawma, SDPO, Kolasib chuan a hawng.

Hawnna inkhawmah hian Pu C Lalmalsawma chuan thu sawiin Lirthei chetsualna chhan tam ber chu lirthei thununtu fimkhur tawkloh vang ani tiin Mizoramah kum 2016 chhung khan Lirthei chetsualna avangin mi 66 in nunna an chan a, kum 2017 ah lirthei chetsualna vawi 64 awmin mihring 51 in nunna an chan thu a tarlang a, hei hian lirthei chetsualna avanga thihna (Death rate) chu a sang hle ani tih a lantir a ni a ti. Motor Vehicle Rules, Traffic Rules leh Road sign te chu zawm that a pawimawh thu sawiin heng dan te hi a bawhchhetu hrem na ngawr ngawr lam niloin Driver, passenger leh mipuite himna tura duan a nih thu a sawi a. Rui chungin emaw, zial zu chungin emaw mobile hmang chunga lirthei khalhloh a pawimawh thu sawi bawkin lirthei khalhtute chu passenger te bakah mipui tamtak nunna chu an kutah thui tak a innghah avangin Road Safety Week chhung chauh niloa Kum tluana fimkhur taka lirthei thunun turin kalkhawm te chu a sawm a ni.

He hunah hian Prominent Journalist Pu S Lalhmachhuana pawhin thu sawiin lirthei chetsualna avanga mi tamtak in harsatna an tawh nasat zia te, thihna a thlen phei chuan chhungkua leh khawtlang ah buaina a thlen nasat zia te sawiin Pathian chauh ina a pek theih nunna hlu tak chu inthladahna avanga kan chan mai loh nan Driver te mawhphurna san zia sawiin rilru fim leh uluk taka lirthei thunun a pawimawh thu a sawi bawk a ni.

He week hi Kolasib Police leh Transport Department tangkawp chuan No Tolerance week atan an hmang dawn bawk a, hemi bakah hian Lirthei thununna chungchanga hriat tur pawimawh Motor Vehicle Rules, Traffic Rules, Road sign leh hawihawmna (manners and Etiquettes) chungchangah February ni 13 leh ni 15 hian Public transport heng Maxi Cab, Taxi leh  Auto-Rickshaw Driver te tan intuaitharna leh inhrilhhriatna hun hman tura ruahman bawk a ni.

Hawnna inkhawm hi Kolasib District Transport Officer Pu R.Lalnunmawia'n a kaihruaia, Sawrkar Official te bakah Public transport hrang hrang khalhtu te an kalkhawm a ni.