999/202-2024

Serchhip 30th June 2023: Vawiin khan Remna Ni vawi 38-na lawmna inkhawm chu Sawngkhara Hall, Keitumah neih a ni a. He lawmna inkhawmah hian Home Minister Pu Lalchamliana chu khuallian niin a hmanpui.

Remna Ni lawmna inkhawm Keituma neih ah hian Home Minister Pu Lalchamliana chuan Mizoram mipui zawng zawngte duhsakna a hlan a. Remna Ni chu Mizo mipuite tana chanchin lawmawm tak a ni tiin remna leh muanna a awm theih nana tha leh zung, nunna hlu tak hlante zahna chibai a buk bawk a ni.

Home Minister chuan kum 20 chhung buaina atang a remna neih a lo nih khan zoram mipuiten an hlut em em a, Remna Ni lo thleng chu mimal, thenawm leh khawtlang inremlo ten inremna ni ah hmang ngei se a duh thu a sawi a. Ram leh hnam dinchhuahna turin zalenna sual a ni a ti a, zoram mipui ten harsatna leh manganna tamtak an tawk a, dinhmun hrehawm tak atanga remna a awm theih nan kohhran, zirlai pawl leh mipuiten theihtawp an chhuah a, zoram mipuite duhthusam ang ngeiin remna( Peace Accord) chu June ni 30, 1986 khan ziah a lo nita a ni, a ti. Remna hi a hlu em em a, a man pek sen rual a ni lo tiin remna awm turin inngaihtlawm leh inphahhniam a ngai a, hruaitu hmasa ten remna a awm theih nana an inphahhniam thei chu fakawm a tih thu a tarlang.

Pu Lalchamliana chuan remna ziah a nih khan India constitution ah article 371G telh a nih thu tarlangin he article hian mizo hnam leh sakhua damna tur thui tak a hril a ti. Nupui pasal neih leh ro luah dan tur chungchang ah Uniform Civil Code (UCC) hman a nih pawhin Mizoram bikah chuan Mizoram Legislative Assembly-in a pawmpui leh phalna tellovin UCC chu hman ngawt theih a ni lo a, Remna ziah laia article 371 G India constitution a telh tura theihtawp chhuah a hma latute an fakawm in an ngaihsan awm hle a ni, a ti.

Khuallian chuan Mizoram sawrkar, MNF leh India sawrkarin inremna (Peace Accord) June ni 30 kum 1986 an ziah atang khan Mizoramah buaina lian tham sawi tur a tam lo hle a, Bru National Liberation Front (BNLF) leh Hmar People's Convention (HPC) nen pawh remna tluantling leh thatak neih a ni a, vawiinah chuan Mizoram chu India rama state ralmuang ber niin remna leh muanna kawngah Mizoram chu state dangte awh ber a lo ni hial a ni, a ti.

Home Minister chuan Mizoram thenawmah remna leh muanna awmloh avangin mi tam takin in leh lo,nunna hlutak an chan mek a, hei hian remna hlutzia a tilang chiang hle a ti a. Zohnahthlak an sahimna zawnga Mizoram lo thlengte chhawmdawl chu Mizote tihmakmawh a ni tiin theihtawp chhuah a lo chhawmdawl zel turin zoram mipuite a ngen a ni. Zohnahthlak harsatna tawk mek ten remna leh muanna tluantling an neih theihna tura tawngtai fo turin mipuite chah bawk.

Remna ni hi "Political Party' pakhat ta bik a ni lo tiin Pu Lalchamliana chuan Mizoram mipui zawng zawngte ta a ni a ti a, zoram mipuite neitu thinlungpu a, Remna Ni chu uar zawk a hmang zel thin turin a sawm a ni.