1000/2023-2024

Champhai, the 30th June, 2023: Excise & Narcotics Department Champhai leh Champhai to Aizawl Maxi Cab Service Owners' Welfare (CAMS) te chuan nimin khan ruihhlo leh a kaihhnawih do kawnga thawhdunna tur inremna thuthlung an ziak. Thawhhona thuthlung hi nihnih (June ni 29-30,2023) chhung awh, 'Drivers Meet cum Awareness' Champhai Vengthlang YMA Hall-a neihah ziah a ni.

He hun hmanpuia zirtirna petu Pu Vanlalvura Ralte, Asst. Commissioner of Excise & Narcotics Department Champhai chuan Driver hna chu hna pawimawh leh zahawm tak a nih thu sawiin, a taka mite dawrtu leh midangte tana malsawmna thlen thintu an ni, a ti a. Amaherawhchu a chhe zawngin dan phal loh ruihhlo, kawltu leh zuarte phura ram leh hnam tana mi hnawksak an nih hlauh theih dante a tarlang a. An passenger leh bungraw phurhte pawh fimkhur taka endik thin turin a ngen nghal bawk a ni.

Champhai chu drugs siamna hmunpui 'Golden Triangle' awmna Myanmar ramri depa awm a nih avangin drugs phurh leh zawrhna kalkawng pui a awm a nih thu te, drugs-in mizo thalai tam tak nunna a lak tawh thu leh tunlaia drugs hluar nasa zel hian chhiatna nasa zawk a thlen theih thute a sawi bawk a. Maxi Cab khalhtute chu ruihhlo leh a kaihhnawih do kawnga thahnemngai taka thawhpui atan a sawm a ni.

He hunah hian ruihhlo do kawnga awmze nei zawka thawhho a nih theih nana pawimawhte sawiho a ni a. Kalkhawmte remtihna angin thawhhona thuthlung duante chu pawm a ni a, Excise & Narcotics Department atangin Asst. Commissioner leh Officer-in-Charge bakah Champhai to Aizawl Maxi Cab Service Owners' Welfare aiawhin Chairman leh Secretary-te'n thawhhona thuthlungah hian hming an ziah hnan a ni.

Thawhhona thuthlung point 5 ziah kaltlang hian  drugs laka mimal, chhungkua, khawtlang leh ram leh hnam a him theih nana thawhho dan turte bakah hemi lam hawi inzirtirna, awareness campaign tam thei ang ber nei tura thawhho dan turte leh pawimawh dangte a tel a. He thawhdunna thuthlung hian ziah a nih ni atanga kum khat chhung a huam dawn a ni.