1001/2023-2024

Lunglei, the 30th June, 2023: Remna Ni champhaphak vawi 37-na Lunglei District-a lawmna pui ber chu vawiin khan Convention Centre-ah khuallian Lunglei High Powered Committee Vice Chairman Pu Lawmawma Tochhawng hovin ropui taka hman a ni.

He hunah hian Remna Ni 2023 puala Art & Photography Exhibition, I&PR Department Lunglei leh Lunglei Photographers’ Association te tangkawp buatsaih chu Lunglei South bialtu MLA Dr K.Pachhunga’n a hawng a. Remna ni 2023 pual a Quiz, Essay, Short Video, Painting leh Photography Competition buatsaih a lawmman late hnen ah lawmman sem a ni bawk.

Pu Lawmawma Tochhawng chuan kalkhawmte chu Remna Ni chibai bukin Remna leh Muanna kan neih theihna tura ram tana inpe hnam sipai leh martarte zahna chibai a buk a. Remna leh muanna kan neih avanga zirna, thiamna, hriselna, leh mihring khawsak kawng hrang hranga Mizoramin hmasawnna tam tak kan nei thei hi kan vannei takzet a ni tiin he muanna kan neih vawngnung zel turin mitinten mawhphurna sang tak kan nei theuh a ni, a ti a. Khawvel pum huap pawha remna thutlung hlawhtling berte zinga mi Mizoram Accord, 1986: Memorandum of Settlement chuan remna leh muanna a thlen mai bakah Mizoram tana hmasawnna pawimawh tak tak – University changtlung tak Mizoram University, leh Mizoram High Court ruahman mek te kan neih theih phah hi a ropui takzet a ni, a ti a. Kalkhawmte chu remna leh muanna hlutzia hre thar leha, nitin khawsakna, hnathawhna leh chetvel na ahte chhawmnung zel turin a sawm nghal bawk a ni.

Vawiin program-ah hian Rev H. Lallianzara, Administrative Secretary, Synod Office Lunglei chuan hunserh a hmang a. Lunglei DC Pi Ramdinliani chuan program hi kaihruaiin, Prof J. Zorema, Principal (Rtd) Government J Buana College chuan "Peace for Prosperity" tih thupui hmangin thusawina huna hmang a. Lunglei Additional DC Pu Donny Lalruatsanga chuan lawmthu a sawi a ni.

Sub Headquarters YMA Zaipawl leh MUP Hqrs Lunglei te chuan hla remin Rahsiveng Branch YMA te chuan Cheraw an kan a.

Vawiin program-ah hian Lunglei District-a head of office-te, tlawmngai pawl hrang hrang leh khawtlang hruaitute an tel a ni.

Remna Ni 2023 pual hian Lunglei District ah Peace Walk, Cleanliness Drive, Free Medical Camp, Blood Donation Camp te buatsaih a nih bakah intihsiakna hrang hrang neih a ni a. Heng hmalakna ah te hian Sawrkar Department hrang hrang thawktute, zirlaite, YMA, MHIP, MUP member-te, khawtlang hruaitute leh mipui mimirte phur takin an thawk chhuak a ni.