1002/2023-2024

Champhai, the 30th June, 2023: Vawiin chawhnu dar 2:00 khan Mizoram hmun dangte rualin Mizo Zirlai Pawl Headquarters, Champhai buatsaihin Remna Ni champhaphak vawi 37-na lawmna hun hman a ni a, he hun hi Law & Judicial Minister Pu T.J. Lalnuntluanga chuan Khuallian niin a hmanpui a, Champhai District Bawrhsap Pu James Lalrinchhana chu Khualzahawm a ni.

Khuallian Pu T.J. Lalnuntluanga chuan Remna Ni tobul sawifiahin, hnam ziarang chawinun leh zalenna neih a nih theih nan pi leh pu te'n theihtawp an chhuah a, an hmalakna leh thawhrimnate kan ngaihlu thiam tur a ni, a ti a. Mizoram leh India inkara remna thuthlung ziah chu khawvela remna ziah hlawhtling ber pawl a nih avangin Remna Ni hi mipuite'n kan hlut thiam a ngai a ni, a ti a. Law & Judicial Minister chuan khawvel changkanna um ve mek zel kan nih thu pawh sawiin, hma kan sawn zel theihnan turin thalaite chu an thiltihna apiangah hlawhtlinna hmu thei tura theihtawp chhuah turin a chah a. Hnam zalenna leh remna a lo awm theih nana tha thawhtu zawng zawngte chhuanawm a tih thu a sawi bawk.

Thusawitu dang Khualzahawm Champhai District Bawrhsap Pu James Lalrinchhana chuan tunlai thangtharte zingah hnam ziarang leh nunphung thlahthlam an awm thin chu pawi a tih thu sawiin, kan hnamzia kan pi leh pute'n min hlanchhawn hi ngaisanga chhawmnung zel turin kalkhawmte a chah a. Remna leh muanna hnuaia kum 37 dawn awm hnuah hmasawnna hrang hrangte tarlangin, kalkhawmte chu remna neih chhawr tangkai thiam tur leh muthlu mai lova, hmalam pana ram tana theihtawp chhuah zel turin a chah bawk.

Mizo Zirlai Pawl Headquarters Champhai buatsaih, Remna Ni lawmna hun Kahrawt Community Hall Champhaia neih hi Ralte Zodingliana, Joint Secretary MZP Hqrs. Champhai chuan a kaihruai a. C.Lalrinawmi, ECM in hunserh a hman hnuah, H.Lalruatdika, Secretary, MZP Hqrs.Champhaiin inhmelhriattirna neiin report a pe a. Pi Vinty Vanneihtluangi, Legal Adviser, MZP Hqrs. Champhai chuan Danin mipui chanvo a pek hrang hrangte a sawifiah a. Hnamlam leh zai mawi tak takte thlira ngaihthlak a ni bawk a. Lalpianpuia, Vice President, MZP Hqrs. Champhaiin lawmthu sawiin hun hman a khar a ni.