998/2023-2024

Kolasib dated 30th June 2023: Vawiin chawhma khan Diakkawn YMA Hall, Kolasibah ‘Remna Ni 2023’ lawmna hun hman niin Pu K.Lalrinliana, Minister, Food, Civil Supplies & Consumer Affairs Department chuan Khuallian niin a hman pui a. Pu John LT Sanga, Deputy Commissioner chuan hun kaihruaiin Remna ni 2023 pual a Quiz, Essay, Painting leh Photography Competition buatsaih a lawmman late hnen ah lawmman sem a ni bawk.

Minister Pu K.Lalrinliana chuan remna leh muanna siam tur a Mizo National Front, kohhran leh tlawmngai pawl hmalakna te tarlangin Mizoram hmun hrang hrang ah tawrhna leh harsatna nasa tak a thlen thu sawiin remna leh muanna chu hlut thiam a tul thu a sawi a. Kawng hrang hranga Kolasiba Remna Ni 2023 pual a zirlaite tan a inelna buatsaih a ni chu lawmawm a tih thu leh heng inelna leh Remna ni pual a hun buatsaihna hian thangthar te thinlungah Remna leh muanna hlut zia a hriat thar tir ngei a beisei thu a sawi.

Pu K.Lalrinliana chuan tam nasa tak thleng avanga mizo mipuite harsatna sutkian kawnga Sawrkar laipui hmalakna duhkhawp lohna avanga hnam movement rawn pian chhuah dan te, India sawrkar leh MNF inkar a inbiakna hrang hrang kalpui a nih dan te leh hnam movement tuk zal tumna kawng a mipuiin harsatna hrang hrang an hmachhawn dan te a tarlang a. Remna ni 2023 lawmna hun ah hian zalenna sual a ram tan a nunna hlu tak hlan ta te leh ram tan a pen chhuak la dam te hnen ah zahna chibai a buk bawk a ni. Remna thuthlung hian Mizoram tih hmasawnna atan thil pawimawh tak tak a ken tel thu Minister chuan sawiin Mizo hnam leh ziarang humhalhna te, ram leilung humhalhna leh zirna tih hmasawnna tur a ruahmanna te a tel thu a sawi a. Thangthar ten remna an hlut thiam a, remna siam tur a ram leh hnam tan a inpe te zah thiam turin leh remna a awm zel theih nan zirna leh intodelh kawng ah te tan la zel turin zirlai kalkhawmte a chah a ni.

Hun kaihruaitu Pu John LT Sanga, Deputy Commissioner chuan Mizoramin remna leh muanna a neih theihna tur a nunna hlu tak hlantute, thisen leh mittui tam tak luang ral tawh te leh mipuiin harsatna nasa tak an paltlangte chu thangthar ten theihnghilh lovin Remna hlut nachang an hriat zual zel a duh thu a sawi a. Remna avangin zirna leh eizawnna dap kawng ahte zalen takin kan kalpui theih phah thu sawiin remna siamtu ni zel turin zirlaite a fuih a ni.

Pu Malsawmtluanga, Assistant Professor, Govt. Kolasib College hnen atangin Remna sual chhuak tur a Mizoram zinkawng ngaihthlak a ni a, Pu Thomas D Lalengliana, Chairman, All NGOs Coordination Committee atangin zirlaite fuihna thuchah ngaihthlak a ni bawk. Remna thleng tur a ‘Peace Accord’ duan a nih dan DIPRO buatsaih Video tawi thlir ho niin Remna ni 2023 pual a inelna hrang hranga lawmman late hnen ah lawmman semna neih a ni a, Pi Melody Ngurthantluangi, Addl. DC chuan lawmthu sawina hun a hmang bawk a ni bawk.

Remna ni 2023 pual hian tukin khan DC Office, District Urban Development Office, Remna ni Celebration Committee leh MZP tangkawp chuan Diakkawn leh Venglai inkar ah ‘Peace Walk’ an buatsaih a. Chief Medical Office leh District Hospital-a thawktute chuan Remna Ni pualin vawiin khan Free Medical Camp neiin mi 188 an inentir bawk a ni.