997/2023-2024

Champhai, the 30th June, 2023: Champhai District-a Remna Ni champhaphak vawi 37-na lawmna pui ber chu vawiin chawhma dar 11 khan Kahrawt Community Hall-ah Law & Judicial Minister Pu T.J. Lalnuntluanga hova neih a ni.

Khuallian Pu T.J. Lalnuntluanga chuan kalkhawmte Remna Ni pual chibai bukin, remna leh muanna hnuaiah hmasawnna rahbi zawh a awlsam thin a, mipui kan ralmuangin kan zalen thin a ni, a ti a. Remna chu tu ta bik mah nilo, remna duhtu zofa zawng zawngte ta a nih thu sawiin, thangtharte'n ram leh hnam hmangaihna thinlung an pu chu hmuhnuam a tih thu a sawi a. Zalenna tura beitute, remna nei tura tha thawhtu zawng zawngte hmalakna chhuanawm a tih thu a sawi a. Mizoram chu mahni a ro inrel hran kan nih thin thu leh British ho awpbeh hun lai ata tawh hungbikna dan hmanga ven kan nih dante tarlangin, British chhuah fel hnuah tawnhriat kan neih lohna lai remchangah lain India-in min awpbet a, kum 1950-1960 chhoah Indian culture-in min run nasat avang leh mautam tuar chhawmdawl kawnga hmalak tul nia hriat avangin kum 1959 ah MNFF din a ni a, hei hi kum 1961 ah MNF tia thlak niin, zalenna leh ram inrelbawlna hran nei tura hmalak chhoh a ni ta a ni, a ti a. Hun engemawchen beih a nih hnuah mipui, Kohhran leh NGO te ngenna angin inremna lam hawia hmalak niin June ni 30,1986 ah Peace Accord ziah niin remna leh muanna tluantling leh hlawhtling ber chu ziah a lo ni ta a ni, a ti a. Inremna hmangin ram dan bu Indian Constitution-ah hungbikna dan Article 371G zehtel a ni tiin, buaina hian hnam anga inlungrualna leh ram leh hnam hmangaihna Mizo Nationalism zofate thinlungah a tuh phah a ni, a ti bawk.

Law & Judicial Minister chuan thenawm ram buai avanga kan unau sahimna zawnga inpui rawn pantute tuam hlawm thei tura Pathianin remna leh muanna min pek hi a hlu a, hei hian remna leh muanna hlutzia min hriat nawn tir se, chhawmnung zel tura ngaihtuahna min petu ni se a duhawm hle a ni, a ti a. Zalenna hi a hlut rualin hmang sual lo tura kan inzirtir tam a pawimawh hle a, remna leh muanna ti chhe thei zawnga chetna lakah fihlim kan tum tur a ni, a ti a. Mahniin zalenna kan duh ang bawkin midangte pawhin an duh tih kan hriatthiam a tul a ni, a ti bawk. Ram hmasawnna turin ram changkang zawkte kan um ve mek zel thu sawiin, rilru leh ngaihtuahna hrisel pu chungin ram hruaitute tawiawm chunga hma kan lak a ngai a ni, a ti a. Kalkhawmte chu remna leh muanna hlutzia hre thar leha, nitin khawsakna, hnathawhna leh chetvelnaahte chhawmnung zel turin a sawm nghal bawk a ni.

He hun hi District Bawrhsap Pu James Lalrinchhana chuan kaihruaiin kalkhawmte lawmna thu a sawi a. Remna Ni 2023 lawmna puala District huap program hrang hrang neihte a sawifiah a. Rev. PC Lalropuia'n hunserh hmangin Kanan Branch MHIP in lemchan tawi an entir a. Pu R.Lalchhuanawma, Associate Professor, Dept. of Mizo, Govt. Champhai College-in 'Mizoram Political History' tih thupui hmangin zirtirna a pe a. Pu Lalsanglura Zote, President, Champhai South Block MNF, Pu K.Zamlova, Chairman, Champhai South Joint VC leh Pu Rokima, President, Ex-MNA Champhai te'n thu an sawi bawk a. Pu Lalrinawma, Project Director, DRDO Champhaiin lawmthu sawiin hun hman a khar a ni.

He hunah hian Remna Ni denchhena intihsiakna hrang hrang Painting Competition, Photography Competition, Digital Flyer insiamsiak, High School leh Higher Secondary School-te tana Essay leh Quiz Competition buatsaiha tithate hnenah lawmman sem chhuah a ni bawk.

Hemi hnu hian Law & Judicial Minister Pu T.J. Lalnuntluanga chuan Martarte Hriatrengna Thlan, CHANEM Complex-ah ram leh hnam tana nunna hlantute zahna chibai bukin pangpar a dah a ni.