996/2023-2024

2023 Nikir thla ni 30: Kum 1986 June ni 30-a India sawrkar leh Mizo National Front (MNF) te'n "Remna Thuthlung" (Peace Accord) an thlun fel ni hriat reng nana Mizorama kum tina hman ṭhin, "Remna Ni" chu vawiin khan Central Young Lai Association (CYLA) Hall, Lawngtlaiah Mizoram Legislative Assembly Deputy Speaker Pu H. Biakzaua hovin hman a ni.

Khuallian, Deputy Speaker Pu H. Biakzaua chuan Mizoram zalenna atana nun hlantu hnam sipaite zahna chibai bukin, martar chhungte tuarpuina a hlan a. Hnam hmangaihna rilru aṭanga zalenna sualtute inpekna chu a hlutzia hre thar leh turin mipuite chahin, kan ramin tun dinhmun a thlen theih nan zalenna atana beihna kha mellung pawimawh tak a ni, a ti a. Hnam sipaite'n ramhnuaia harsatna hrang hrang kara kum 20 zet zalenna an sual hnuah an beisei zalenna tluantling chu nei thei ta lo mah i la, kan ram tana remna thuthlung chhenfakawm tak kan neih theih phah hi a lawmawmin, a hlu hle a ni, a ti a. Remna thuthlungin ram leh hnam himna tura min hung bikna te chu a hlutzia kan la hre chho zel dawn a ni, a ti.

Deputy Speaker chuan remna chu ram mipuite duh thuhmun neia ṭan rualna rah a nih thu sawiin, remna hlutzia hre thar leh turin mipuite a chah a. Inremna hlutzia sawiin, inremna chu ram leh hnam hmasawnna rahbi a nih thu te, Kristianna veng himtu a nih thu leh ram danga kan unaute nen mangan nia inṭanpui tawn thei tura min siamtu a nih thu te a sawi a. Remna thu thlun a nih hnuah Mizorama remna leh muanna tluantling a la awm zel thei chu inchhuanna tham a nih thu sawiin, India ram state ralmuang ber kan nihna chu chhawm nung zel turin mipuite a sawm a ni.

Lawngtlaia Remna Ni hmannaah hian District Bawrhsap Pu Abraham Beirazi Khithie chuan inlawmna thu sawiin, Remna Ni 2023 puala Lawngtlai District-a activity hrang hrang buatsaih a nih dan a tar lang a. Presbyterian Church of India (PCI) Lawngtlai Pastor Bial bialtu, Rev. K. Zalawma'n hunserh hmangin, Mizoram Upa Pawl (MUP) Lawngtlai District Headquarters aṭangin hlado chham ngaihthlak a ni a. School Education Department leh Samagra Shiksha, Lawngtlai District te'n essay writing leh quiz competition an buatsaiha ti ṭhate hnenah lawmman sem a ni a. YLA Council Veng Branch te'n hnam lam, 'Pawhlohtlawh' entirin, Government Region Higher Secondary School (GRHSS) National Service Scheme (NSS) Unit te'n lemchan tawi (skit) an entir a. Nl. Vanlalzawmpuii Hrahsel leh Nl. Latei Hringngen te'n zaia kal khawmte awiin, District Rural Development Office-a Project Director Pi Marilyn Rualzakhumthangi chuan lawm thu sawiin hun a khar a ni.

Lawngtlaia Remna Ni hmannaah hian LADC-a Chief Executive Member Pu V. Zirsanga, Chairman Pu VL Hmuaka leh LADC member-te, State sawrkar leh LADC-a officer leh staff-te, zirlaite, tlawmngai pawl hruaitute, political party ai awhte leh chanchinbu mite an tel a. Remna thingpui ruai an kil ho nghal a ni.

Remna Ni 2023 puala School Education Department leh Samagra Shiksha te'n higher secondary school level essay writing competition an buatsaihah Laldinpuii, Don Bosco School, Lawngtlai chu pakhatna niin, pahnihna Lynahrongia, Harvard Higher Academy, Lawngtlai leh pathumna Vanlalhruaia, Don Bosco School, Lawngtlai te an ni a. High school level quiz competition-ah Downtown English School, Lawngtlai chu pakhatna niin, pahnihna Don Bosco School, Lawngtlai leh pathumna Vista English School, Lawngtlai te an ni a. Lawmmanah hian thuziak bakah, pakhatna tan ₹ 30,000/-, pahnihna tan ₹ 20,000/- leh pathumna tan ₹ 10,000/- te pek an ni.

Lawngtlai District-a Remna Ni 2023 lawmna pual hian zirlai naupangte tan quiz leh essay competition buatsaih a nih bakah hian, sawrkar office hrang hrangte'n an office chhehvelah thing an phun a. Education department lamin remna kawng zawh (peace rally) buatsaihin, UD&PA-in faina hnatlang (cleanliness drive) an buatsaih a, 3rd IR Battalion, Thingkah te'n a thlawna thisen pek runpui buatsaihin, Deputy Commissioner Lawngtlai, Association for Voluntary Blood Donation leh Central YLA te ṭang kawpin Remna Ni-ah a thlawna thisen pek runpui an buatsaih bawk.

Pu Laldenga kaihhruai Mizo National Front (MNF)-in March ni 1, 1966-a India sawrkar laka Mizoram zalenna a puan hnuah sawrkar laipui chuan Mizoram chu 'ram buai' (disturbed area)-ah puangin, sipai chakna hmanga MNF tuk dawl leh Mizo hnam harh tharna boruak hmeh mih tumin hma a la a. Kum 20 chhung zet Mizoram chu rambuai dinhmuna a awm hnuah mipui tuarna tihtawp a nih theih nan June ni 30, 1986-ah India sawrkar leh MNF chuan "Remna Thuthlung" an ziak ta a. Hemi ni aṭanga kum 37 ral hnu, vawiin thleng hian Mizoram chu India rama state ralmuang berte zinga mi a la ni ta reng a ni.