Vawiin chawhma khan Mizo Academy of Letters (MAL) chuan an din champhaphak (Foundation Day)  vawi 53-na chu Golden Hall Annexe, Hrangbana College-ah an hmang a. Home Minister Pu R.Lalzirliana chu khuallian a ni. 

Home Minister chuan Mizo te chu tawng khat hmang hnam kan nihna hian inphuarkhawmna kawngah leh khawtlanga nun hona –ah min pui a ni, a ti a. Tawng chu inthlak reng (dynamic) anih thu sawiin, rilru zau zawka kan dawnsawn a tul rualin tawng un leh tawng kauchheh kan vawnhim a pawimawh a ni, a ti a. Pu R.Lalzirliana chuan MAL chu thu leh hla tuipuitu pawl kan neih zinga belhchian dawl ber te zinga mi an nih thu tarlangin tawng humhalhna kawngah hma la zel turin a fuih a. Minister chuan ram pumin kan pawm tlan theih tura thuneitu Language Board  din a tul thu sawiin, hei hian  thu leh hla chawisanna, humhalhna leh hmasawna kawngah thui takin min pui dawn a ni, a ti bawk. 

Mizo Academy of Letters (MAL) hi kum 1964 khan din niin tun dinhmunah hian Donor member 2, Life member 48 leh member 100 chuang an awm mek a. Mizo thu leh hla tihhmasawn nan leh ziak mite chawkphur  turin kum 1989 atang khan kum tin Mizo irawm chhuak lehkhabu (lehlin tello) zinga tha a tih ber “Book of the Year’ MAL hian a thlang thin a, he lawmman hian cheng 5000 leh thu chei (Citation) a keng tel bawk. 

Book of the Year 2016 atan Pu Lalhruaitluanga Chawngte ziah ‘Aizawlah Aizawler’ chu thlan a ni a. Minister chuan lawmman hi a hlan a ni. 

He hun hi MAL President, Pu Lalthangfala Sailo chuan a kaihruai a. Minister chuan Pi Florence LR Ralte lehkhabu ziah ‘Theipui hnuaiah’ tih chu a tlangzarh nghal bawk a. MAL Treasurer, Pu Lal Rinawma chuan lawmthu sawina in a khar a ni.